-
काठमाडौं ।
एकजना उपसचिवले सरकारलाई मुद्धा हाल्ने चेतावनी दिएका छन् ।
उपसचिव प्रेमप्रसाद सञ्जेलले सरकारले आफूमाथि अन्याय गरेको भन्दै सरकारबिरुद्ध अदालत जाने बताएका हुन् ।निजामती कर्मचारी ऐन विपरीत आफूलाई ७० दिन पनि नपुगी विराटनगर श्रम कार्यालयबाट सरुवा गरिएको तथा तलबसमेत रोक्का गरेको उल्लेख गर्दै न्यायका लागि दुई दिनभित्रै सर्वोच्च अदालत जाने उपसचिव सञ्जेलले बताए ।
पत्रकार सम्मेलन गरेर उनले दुई वर्ष काम गर्न दिनुपर्नेमा निजामती ऐन विपरीत आफ्नो सरुवा भएको दाबी गरे। श्रम, रोजगार तथा सामाजिक सुरक्षा मन्त्रालयका सचिव महेशप्रसाद दाहालले आफूलाई ऐन विपरित ७० दिनमै सरुवा गरेको उनको भनाई छ । दाहाललाई विभागीय कारबाही गर्न पनि उनले माग गरेका छन् ।
आफूलाई श्रम, रोजगार तथा सामाजिक सुरक्षा मन्त्रालयले गैर कानुनी ढंगले सरुवा गरेर दुःख दिएको उपसचिव सञ्जेलको भनाइ छ।
उपसचिव सञ्जेलले आफूलाई गरिएको सरुवा गैरकानुनी भएको कुरा प्रधानमन्त्री केपी शर्मा ओलीलाई पनि जानकारी गराएको उल्लेख गर्दै त्यसमा सचिव दाहालले अझै सुनुवाई नगरेकोमा पनि आक्रोश व्यक्त गरेका थिए।
