काठमाडौं । बिहीबारसम्म नेपालमा कोरोना भाइरस संक्रमितको संख्या ४२ हजार ८७७ पुगेको छ । विगत २४ घण्टामा थप १ हजार २२८ जना कोरोना संक्रमित थपिएको स्वास्थ्य तथा जनसंख्या मन्त्रालयले पुष्टि गरेको छ । तीमध्ये ३९४ महिला र ८३४ जना पुरुष रहेका छन् । मन्त्रालयको नियमित कोभिड–१९ प्रेस ब्रिफिङमा प्रवक्ता डा. जागेश्वर गौतमले यीसँगै अहिलेसम्म मुलुकभर कोरोना संक्रमितको संख्या ४२ हजार ८७७ पुगेको बताएका छन् ।

यसै अवधिमा थप ९ सय १७ जना कोरोनाबाट मुक्त भएका छन् । यीसहित अहिलेसम्म निको हुनेको संख्या २४ हजार २ सय ७ पुगेको प्रवक्ता डा. गौतमले बताए । उनका अनुसार अहिले सक्रिय संक्रमितको संख्या १८ हजार ४ सय १३ पुगेको छ । तीमध्ये होम आइसोलेसनमा ७ हजार ७४२ र संस्थागत आइसोलेसनमा १० हजार ६७१ जना उपचाररत रहेका छन् ।

मन्त्रालयका अनुसार हाल क्वारेन्टाइनमा ६ हजार ७४९ जना रहेका छन् । त्यस्तै २४ घन्टाको अवधिमा १३ हजार ४१३ पीसीआर परीक्षण भएका छन् ।

त्यसैगरी पछिल्लो २४ घण्टामा थप ६ जना कोरोना संक्रमितको मृत्यु भएको मन्त्रालयले पुष्टि गरेको । यसरी अहिलेसम्म कोरोनाबाट ज्यान गुमाउनेको संख्या २ सय ५७ पुगेको सरकारी तथ्यांकमा उल्लेख गरिएको छ ।