काठमाडौं । विगत २४ घण्टामा उपत्यकामा मंगलबार ४ सय ८१ जना कोरोना संक्रमित भेटिएका छन् । तीमध्ये काठमाडौँमा ३९३, ललितपुरमा ५८ र भक्तपुरमा ३० जना भेटिएको स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमले जानकारी दिएका हुन् ।

प्रवक्ता गौतमका अनुसार विगत २४ घण्टामा मुलुकभरबाट १ हजार ६९ जना थपिएसँगै नेपालमा अहिलेसम्म कोरोना संक्रमितको संख्या ४० हजार ५ सय २९ पुगेको छ । त्यसैगरी २२ हजार १ सय ७८ जना कोरोना मुक्त भएर घर फर्किएका छन् । अहिले देशभर सक्रिय संक्रमितको संख्या १८ हजार १ सय १२ छ । हालसम्म क्वारेन्टाइनमा ७ हजार ३९० जना रहेका छन् ।