काठमाडौं । विगत २४ घण्टामा नेपालमा ९२७ जनामा कोरोनाभाइरस संक्रमण पुष्टि भएको स्वास्थ्य तथा जनसंख्या मन्त्रालयले बताएको छ यसअवधिमा १० हजार २ सय २९ वटा नमूनाको पीसीआर परीक्षण हुँदा थप ९२७ जना संक्रमित भएको मन्त्रालयका प्रवक्ता डा. जागेश्वर गौतमले बताए । यसरी अहिलेसम्म नेपालमा कुल संक्रमितको संख्या ३६ हजार ४ सय ५६ पुगेको प्रवक्ता डा. गौतमले जानकारी दिए ।

पछिल्लो २४ घन्टामा थप १ सय ६९ जना डिस्चार्ज भएका छन् । यीसँगै अहिलेसम्म कोरोनामुक्त हुनेको संख्या २० हजार २४२ पुगेको मन्त्रालयले बताएको छ ।

मन्त्रालयका अनुसार मुलुकभर सक्रिय संक्रमिको संख्या १६ हजार १९ जना रहेको छ । त्यस्तै अहिले क्वारेन्टाइनमा रहनेको संख्या ८ हजार ९ सय ३९ छ । हालसम्म नेपालमा पीसीआर परीक्षणको कुल संख्या ६ लाख ५८ हजार ११० पुगेको छ ।

त्यसैगरी पछिल्लो २४ घण्टामा कोरोना संक्रमणबाट थप १२ जनाको मृत्यु भएको मन्त्रालयले पुष्टि गरेको छ । यसरी अहिलेसम्म नेपालमा कोरोनाका कारण ज्यान गुमाउनेको संख्या १९५ पुगेको मन्त्रालयको तथ्यांकमा उल्लेख गरिएको छ ।