काठमाडौं । पछिल्लो २४ घण्टामा मुलुकभरबाट १० हजार २३४ वटा नमुनाको परीक्षण भएकोमा ७४३ जना कोभिड–१९ का नयाँ संक्रमित थपिएको स्वास्थ्य तथा जनसंख्या मन्त्रालयले बताएको छ । यीसहित नेपालमा संक्रमितको संख्या ३२ हजार ६ सय ७८ पुगेको मन्त्रालयका प्रवक्ता डा. जागेश्वर गौतमले बताएका छन् ।

आज थपिने नयाँ संक्रमितमा काठमाडौं उपत्यकामा मात्र २२४ जना रहेका छन् । तीमध्ये काठमाडौंमा १७७, ललितपुरमा ३३ र भक्तपुरमा १४ जना रहेको सोमबारको कोभिड–१९ अपडेट ब्रिफिङ प्रवक्ता डा. गौतमले जानकारी दिएका छन् ।

मन्त्रालयका अनुसार अहिले कुल संक्रमित मध्ये १३ हजार ७ सय २५ जनाको उपचार भइरहेको छ । त्यसमध्ये ४ हजार ५ सय ६१ जना होम आइसोलेसनमा बसेका छन् ।अहिलेसम्म कुल १८ हजार ८०६ संक्रमित निको भएर घर फर्किएका छन् । पछिल्लो २४ घण्टाको अवधिमा विभिन्न कोरोना उपचार केन्द्रबा थप १७५ जना कोरोना जितेर डिस्चार्ज भएका छन् ।

त्यसैगरी यस अवधिमा थप ८ जनाको मृत्यु भएको मन्त्रालयले पुष्टि गरेको छ । यीसँगै अहिलेसम्म नेपालमा कोरोनाकै कारण मृत्यु हुनेको संख्या १५७ पुगेको मन्त्रालयको तथ्यांकमा उल्लेख गरिएको छ ।