काडमाडौं । आइतबार देशभरबाट ८१८ जना कोरोना संक्रमित थपिएका छन् । स्वास्थ्य तथा जनसंख्या मन्त्रालयको कोभिड–१९ प्रेस ब्रिफिङमा प्रवक्ता डा. जागेश्वर गौतमले नयाँ थपिएको संख्याबारे पुष्टि गरेका हुन् । यीसँगै नेपालमा हालसम्म संक्रमित हुनेको संख्या ३१ हजार ९ सय ३५ पुगेको छ । प्रवक्ता डा. गौतमका अनुसार विगत २४ घन्टामा ८ हजार २६ वटा नमूनाको पीसीआर परीक्षण भएको थियो ।

त्यसैगरी सोही अवधिमा थप ३ जनाको कोरोनाबाट मृत्यु भएको छ। मृतकहरु झापाका ५८ वर्षीय पुरुष, पर्साकी ५६ वर्षीया महिला र सर्लाहीकी ३३ वर्षीया महिला भएको प्रवक्ता डा. गौतमले पुष्टि गरेका छन् । यीसँगै नेपालमा आइतबारसम्म कोरोना संक्रमणबाट ज्यान गुमाउनेको संख्या १४९ पुगेको छ ।

मन्त्रालयका अनुसार यसै अवधिमा विभिन्न कोरोना उपचार अस्पतालबाट थप २८१ जना डिस्चार्ज भएका छन् । यसरी हालसम्म निको हुनेको संख्या १८ हजार ६३१ पुगेको छ । संक्रमितको कुल संख्यामा निको हुनेको संख्या ५८ प्रतिशत भएको मन्त्रालयले बताएको छ ।

त्यस्तै अहिले आइसोलेसनमा १३ हजार १ सय ५५ जनामा सक्रिय संक्रमितको उपचार भइरहेको छ । तीमध्ये ९ हजार २१२ जना संस्थागत आइसोलेसनमा रहेका छन् भने बाँकी होम आइसोलेसनमा छन् । मुलुकभरका क्वारेन्टाइनमा ११ हजार ४ सय १४ जना रहेको मन्त्रालयले बताएको छ । अहिलेसम्म ६ लाख ४ सय ४४ जनाको पीसीआर परीक्षण भएको छ ।