काठमाडौँ । काठमाडौं उपत्यकामा विगत २४ घण्टामा थप २०५ जनामा कोरोना संक्रमण पुष्टि भएको छ । स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमले काठमाडौंमा १३८, ललितपुरमा ५० र भक्तपुरमा १७ जना संक्रमित थपिएको पुष्टि गरेका हुन् । सोमबार १६८ जना संक्रमित भएका थिए ।

प्रवक्ता गौतमका अनुसार विगत २४ घण्टामा १३ हजार ४६१ वटा नमुनाको पीसीआर विधिबाट परीक्षण भएकोमा मुलुकभरबाट १ हजार १६ जनामा संक्रमण पुष्टि भएको छ । यीसँगै नेपालमा कोरोना संक्रमितको संख्या २८ हजार २ सय ५७ पुगेको छ ।

त्यसैगरी पछिल्लो २४ घण्टामा कोरोनाबाट थप ७ जनाको मृत्यु भएको मन्त्रालयले पुष्टि गरेको छ । अहिलेसम्म कोरोनाकै कारण ज्यान गुमाउने संंख्या ११४ पुगेको मन्त्रालयको तथ्यांकमा उल्लेख गरिएको छ ।