काठमाडौं । पछिल्लो २४ घण्टामा कोभिड–१९ संक्रमणका कारण पर्सामा थप दुईको मृत्यु भएको छ । संक्रमणकै कारण पर्सामा मात्र मृत्यु हुनेको संख्या हालसम्म १७ पुगेको छ । यीसहित देशभरि कोरोनाकै कारण मृत्यु हुनेको कुल संख्या ६० पुगेको हो । मृत्यु हुनेमा पर्साको पोखरिया नगरपालिका–९ की १८ वर्षीया युवती रहेकी छिन् । स्वास्थ्यमा समस्या भएपछि उपचारका लागि नेसनल मेडिकल कलेजमा ल्याउँदै गर्दा उनको बाटोमै मृत्यु भएको बताइएको छ । शव अस्पतालमै राखेर स्वाब संकलन गरी परीक्षणका लागि नारायणीको प्रयोगशाला पठाइएकोमा मंगलबार रातीमात्र कोरोना पुष्टि भएको बताइएको छ ।

त्यसैगरी पर्साकै कोरोना संक्रमित अर्का ४६ वर्षीय पुरूषको वीरगञ्ज हेल्थ केयर अस्पतालमा उपचारका क्रममा बुधबार बिहान मृत्यु भएको नारायणी अस्पतालका मेडिकल सुपरिटेन्डेन्ट डाक्टर मदनकुमार उपाध्यायले जानकारी दिएका छन् । वीरगञ्ज निवासी ती पुरूषमा ज्वरो र खोकीको समस्या देखिएको बताइएको छ । उनमा सोमबारमात्र कोरोना संक्रमण पुष्टि भएको थियो ।