काठमाडौं । शुक्रबार थप २२४ जनामा कोरोना संक्रमण पुष्टि भएको छ । पछिल्लो चौबीस घण्टामा १० हजार ७६८ वटा नमूनाको परीक्षण भएकोमा २२४ जना कोरोना संक्रमित थपिएको स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमले पुष्टि गरेका हुन् । यीसँगै नेपालमा अहिलेसम्म कुल संक्रमितको संख्या १९ हजार ७७१ पुगेको छ ।

सोही अवधिमा थप १५१ जना संक्रमित निको भएर घर फर्किएका छन् । यो सँगै १४ हजार ३९९ जना कोरोना निको भएर डिस्चार्ज भएको मन्त्रालयको नियमित कोभिड–१९ प्रेस ब्रिफिङमा प्रवक्ता डा. गौतमले जानकारी दिएका छन् । यो संक्रमित निको हुने दर ७२.८ प्रतिशत हो ।

त्यसैगरी सक्रिय संक्रमित ५ हजार ३१६ जनाको मुलुकभरका विभिन्न कोभिड-१९ अस्पतालको आइसोलेसनमा उपचार भइरहेको मन्त्रालयले बताएको छ । अहिले क्वारेन्टाइनमा १२ हजार एक सय ११ जना रहेका छन् । मन्त्रालयको तथ्यांकअनुसार हालसम्म ३ लाख ७५ हजार ४ सय १६ जनाको पिसिआर परीक्षण भएको छ ।