काठमाडौं । शुक्रबार थप १३३ व्यक्तिमा कोभिड-१९ संक्रमण देखिएको र एक व्यक्तिको मृत्यु भएको जानकारी स्वास्थ्य तथा जनसंख्या मन्त्रालयले पुष्टि गरेको छ । मन्त्रालयका प्रवक्ता डा. जागेश्वर गौतमले उक्त संख्यामा नयाँ व्यक्ति थपिएसँगै नेपालमा कोरोना संक्रमितको संख्या १८ हजार ३७४ पुगेको जानकारी दिएका हुन् । उनका अनुसार पछिल्लो चौबीस घण्टामा ३ हजार ९८७ वटा नमूनाको आरटी पीसीआर परीक्षण गरिएको थियो ।

आज थपिने नयाँ संक्रमितमा काठमाडौं उपत्यकाका १० जना रहेको सो अबसरमा प्रवक्ता गौतमले जानकारी दिएका छन् ।

मन्त्रालयका अनुसार शुक्रबार बिहान बिरगञ्ज महानगरपालिका वडा नं ११, श्रीपुर निवासी ८५ वर्षीया महिलाको मृत्यु भएको छ । उनको उपचारको क्रममा नारायणी उपक्षेत्रीय अस्पताल, बिरगञ्जमा निधन भएको मन्त्रालयले जनाएको छ । मुटु सम्बन्धी रोगसँगै निमोनियाबाट ग्रसित उनलाई उपचारको लागि अस्पताल भर्ना गरिएको थियो । यीसँगै नेपालमा हालसम्म कोरोनाकै कारण मृत्यु हुनेको संख्या ४४ जना पुगेको छ ।

त्यसैगरी आज विभिन्न कोरोना उपचार केन्द्रबाट थप १०७ जनाले कोरोना जितेर घर फर्किएका छन् । यसरी अहिलेसम्म कोरोना जित्नेको कुल संख्या १२ हजार ९४७ पुगेको छ । यो निको दर ७०.५ प्रतिशत हो । आइसोलेसनमा ५ हजार ३८३ जनाको उपचार भइराखेको छ भने हाल क्वारेन्टाइनमा रहनेको संख्या १९ हजार ४ सय ४४ पुगेको मन्त्रालयले जानकारी दिएको छ ।