दक्षिण अफ्रिकामा बन्दुकधारीहरूले गोली चलाउँदा कम्तीमा १२ जनाको मृत्यु । जोहानेसबर्ग शहरको पूर्वमा रहेको क्लिभल्यान्डको एक बस्तीमा हिजो राति भएको गोलीबारीमा अन्य ९ जना घाइते भएका प्रहरीलाई उद्धृत गर्दै समाचार संस्था अलजजीराले जनाएको छ ।

जम्पर्स अनौपचारिक बस्तीमा भएको आक्रमणपछि प्रहरीले १० जनाभन्दा धेरै संदिग्धको खोजी शुरू गरेको छ । आक्रमणको उद्देश्य अहिलेसम्म थाहा भएको छैन ।

दक्षिण अफ्रिका विश्वको सबैभन्दा उच्च हत्या दर भएका देशमध्ये एक हो । दक्षिण अफ्रिकामा औसतमा प्रतिदिन झन्डै ६० जनाको हत्या हुने गरेको छ ।

दक्षिण अफ्रिकी बन्दुकधारी सङ्घका गिदोन जुबर्टले उद्धृत गरेको तथ्याङ्कअनुसार दक्षिण अफ्रिकामा कानूनी रूपमा राखिएका झन्डै ३० लाख हतियार छन् र कम्तीमा त्यति नै सङ्ख्यामा इजाजतपत्रविनाका हतियार छन् ।