युद्ध शुरू भएयता इरानी आक्रमणबाट अमेरिकाका २० वटा सैन्य स्थलमा क्षति पुगेको विवरण सार्वजनिक भएको छ ।

गएको फेब्रुअरी २८ मा अमेरिका र इजरायलको संयुक्त आक्रमणपछि शुरू भएको युद्धमा अमेरिकी अधिकारीहरूले सार्वजनिक रूपमा स्वीकार गरेकोभन्दा धेरै सैन्य स्थलमा क्षति पुगेको उपग्रह तस्वीर र भिडियोहरूलाई उद्धृत गर्दै बीबीसीले जनाएको छ ।

इरानले फेब्रुअरीको अन्त्यदेखि मध्यपूर्वका ८ वटा देशका प्रमुख सुविधाहरूलाई लक्षित गरेर आक्रमण गरेको छ । इरानी आक्रमणका कारण अत्याधुनिक वायु रक्षा प्रणाली, इन्धन भर्ने विमान र राडारहरूमा लाखौँ डलरको क्षति पुगेको खबरमा उल्लेख छ ।

इरानले विगत तीन महिनामा आफ्नो भूमि र लेबनानमा अमेरिका–इजरायली आक्रमणको बदला लिने उद्देश्यले अमेरिकी सैन्य अड्डा र दुई देशका साझा सैन्य सुविधा दुवैलाई निशाना बनाएको छ ।

यस्तै अमेरिकी रक्षा विभागको मुख्यालय पेन्टागनले ‘अपरेशन एपिक फ्युरी’ शुरू भएदेखि इरानमा १३ हजारभन्दा धेरै लक्ष्यहरूमा आक्रमण गरेको बताएको छ ।

यसैबीच इरानका सर्वोच्च नेता मोज्तबा खामेनीले अमेरिकी सैन्य संरचनामाथिको आक्रमणलाई आफ्नो सेनाको उपलब्धिका रूपमा व्याख्या गरेका छन् । उनकाअनुसार अब मध्यपूर्व अमेरिकी सैन्य अड्डाहरूका लागि सुरक्षित ठाउँ होइन ।

अमेरिकी प्रशासनले भने इरानको सैन्य क्षमता झन्डै ध्वस्त पारेको दाबी गर्दै आएको छ ।

बीबीसीको विश्लेषणअनुसार इरानी आक्रमणबाट साउदी अरब, संयुक्त अरब इमिरेट्स (यूएई), कतार, कुवेत, इराक, जोर्डन, बहराइन र ओमानमा रहेका अमेरिकी सैन्य अड्डा प्रभावित भएका छन् । यद्दपि केही विश्लेषकहरूका अनुसार प्रभावित अड्डाको सङ्ख्या २८ सम्म पुग्न सक्छ ।