सन् २०२६ को पहिलो तीन महिनामा तालिबान सेना र पाकिस्तानी सेनाबीचको सीमापार द्वन्द्वका कारण कम्तीमा ३७२ जना अफगानी नागरिक मारिएका छन् । दुई देशबीचको द्वन्द्वका कारण अन्य ३९७ जना घाइते भएका संयुक्त राष्ट्रसङ्घलाई उद्धृत गर्दै अन्तर्राष्ट्रिय समाचार संस्था एएफपीले जनाएको छ ।

सन् २०२१ मा तालिबान सत्तामा फर्किएपछि अफगानिस्तान र पाकिस्तानबीच सीमापार झडपहरू उल्लेखनीय रूपमा बढेका खबरमा उल्लेख छ ।

तालिबान सरकारले आतङ्ककारीहरूलाई आश्रय दिइरहेको पाकिस्तानले आरोप लगाएको छ । यद्दपि यो आरोपको तालिबानले खण्डन गर्दै आएको छ ।

यसैबीच पाकिस्तानले यस वर्षको शुरूदेखि द्वन्द्वमा १३० जना पाकिस्तानी नागरिक र सुरक्षाकर्मी मारिएका बताएको छ ।

अफगानिस्तान र पाकिस्तानबीच लामो समयदेखि चलिरहेको सीमापार झडप गएको वर्षको अक्टोबरमा झनै चर्किएको थियो ।