तेल उत्पादक देशहरूको सङ्गठन ‘ओपेक प्लस’का सदस्य देशहरूले विश्व बजारमा आपूर्ति हुने तेल उत्पादनको कोटा बढाउने निर्णय गरेका छन् । तेल बजारमा बढ्दो दबाब र अस्थिरता नियन्त्रण गर्ने उद्देश्यले यो कदम चालिएको बीबीसीले जनाएको छ ।

यसमा साउदी अरब र रूस सहित अन्य ५ वटा सदस्य देशहरू सामेल छन् । सात वटा प्रमुख तेल उत्पादक देशहरूले आउँदो जुन महिनादेखि दैनिक १ लाख ८८ हजार ब्यारेल तेल उत्पादन बढाउने घोषणा गरेका छन् । यो निर्णय मध्यपूर्वमा चलिरहेको द्वन्द्वका कारण तेलको मूल्यमा परेको असरलाई सन्तुलनमा राख्ने प्रयासका रूपमा हेरिएको छ ।

ओपेक प्लसले निकालेको विज्ञप्तिमा विश्व बजारमा स्थिरता कायम गर्न सदस्य देशहरूबीच सामूहिक प्रतिबद्धता आवश्यक रहेको उल्लेख छ । यो निर्णयअघि हिजो अल्जेरिया, इराक, कजाखस्तान, कुवेत, ओमान, रूस र साउदी अरबबीच अनलाइन बैठक भएको थियो ।

यसअघि मार्च र अप्रिल महिनामा पनि ओपेक प्लसले दैनिक झण्डै २ लाख ६ हजार ब्यारेल उत्पादन वृद्धि गर्ने निर्णय गरेको थियो, जसकै निरन्तरता स्वरूप नयाँ उत्पादन वृद्धि घोषणा गरिएको विश्लेषकहरूको भनाइ छ ।

उता संयुक्त अरब इमिरेट्स (यूएई)ले भने हालै ओपेक समूहबाट बाहिरिने घोषणा गरेको छ । मध्यपूर्वमा अमेरिका, इजरायल र इरानबीचको तनावका कारण विश्व ऊर्जा बजारमा अनिश्चितता बढिरहेका बेला यूएईले यस्तो निर्णय लिएको हो । यूएई बाहिरिएसँगै ओपेक समूहको संरचनामा समेत परिवर्तन आएको छ ।