इरानले ‘स्ट्रेट अफ हर्मुज’ जलमार्ग भएर आउजाउ गर्ने जहाजहरूमाथि लगाएको ‘टोल फी’ बापतको पहिलो राजस्व प्राप्त गरेको इरानी संसद्का उपसभामुखले बताएका छन् । हर्मुज जलमार्ग प्रयोगबापतको शुल्कबाट उठेको राजस्व केन्द्रीय बैंकको खातामा जम्मा भएको इरानी संसद्का उपसभामुख हमिदरेजा हाजिबाबाईलाई उद्धृत गर्दै बीबीसीले जनाएको छ ।

इरानले जहाजबाट कति शुल्क लिएको र कसले दिएको भन्ने विवरण सार्वजनिक भएको छैन । यसअघि अमेरिकी राष्ट्रपति डोनाल्ड ट्रम्पले हर्मुज प्रयोग गरेबापत इरानलाई राजस्व तिर्ने जहाजहरूलाई निशाना बनाउने बताएका थिए।

यस्तै इरानले अमेरिकी नाकाबन्दी रहिरहेसम्म हर्मुज पुनः नखोल्ने अडान लिएको छ । युद्धविराम लम्ब्याइए पनि व्यवहारमा उल्लङ्घन भइरहेको आरोप लगाउँदै इरानले हर्मुज नखोल्ने बताएको हो । इरानले दुई वटा विदेशी जहाजलाई नियन्त्रणमा लिएको जनाएको छ ।

यसैबीच अमेरिकी जलसेनाका प्रमुख जोन फेलन ट्रम्प प्रशासनबाट अलग भएका पेन्टागनले जनाएको छ । फेलनको बर्हिगमनबारे कुनै कारण सार्वजनिक भएको छैन तर पेन्टागनका प्रवक्ताले तत्कालै लागू हुने गरी उनको पदबाट हटेको सामाजिक सञ्जालमार्फत जानकारी दिएका छन् ।

अब उनको ठाउँमा जलसेनाका उपप्रमुख हङ काओले कार्यवाहक जलसेना प्रमुखको जिम्मेवारी सम्हाल्ने बीबीसीले जनाएको छ ।