उत्तरी जापानमा ७ दशमलव ४ म्याग्निच्युडको शक्तिशाली भूकम्प गएपछि जापान मौसम विज्ञान एजेन्सी ९जेएमए० ले तीन मिटरसम्म अग्ला सुनामी छाल आउन सक्ने चेतावनी जारी गरेको छ । भूकम्पपछि अधिकारीहरूले तटीय क्षेत्रका मानिसहरूलाई तत्काल सुरक्षित ठाउँमा सर्न आग्रह गरेको अन्तर्राष्ट्रिय समाचार संस्था एएफपीले जनाएको छ ।

नेपाली समयअनुसार आज दिउँसो २ बजेर ७ मिनेटमा इवाटे प्रान्तको प्रशान्त महासागर क्षेत्रको तटीय भागमा केन्द्रित भएर भूकम्प गएको हो । भूकम्पको धक्का सयौँ किलोमिटर टाढा टोकियोसम्म महसुस भएको खबरमा उल्लेख छ ।

जापान मौसम विज्ञान एजेन्सीका अनुसार प्रारम्भिक सुनामी छालहरू उत्तरी तटीय क्षेत्रमा छिट्टै आइपुग्न सक्ने जोखिम रहेको छ । जापान सरकारको प्रधानमन्त्री कार्यालयले आपत्कालीन अवस्था व्यवस्थापन गर्न सङ्कट व्यवस्थापन टोली गठन गरेको जनाएको छ । अधिकारीहरूले अवस्थाको निरन्तर निगरानी गरिरहेको बताएका छन् ।

प्रशान्त महासागरको ‘रिङ अफ फायर’ क्षेत्रमा रहेको जापान विश्वकै सबैभन्दा भूकम्पीय जोखिमयुक्त देशमध्ये एक मानिन्छ ।

झन्डै १२ करोड ५० लाख जनसङ्ख्या रहेको जापानमा वार्षिक औसत झन्डै १ हजार ५०० भूकम्पीय धक्का महसुस हुन्छ । यद्यपि धेरैजसो भूकम्प हल्का प्रकृतिका हुने भए पनि भूकम्पको गहिराइ र ठाउँका आधारमा क्षतिको स्तर फरक पर्ने गर्छ ।

यसअघि सन् २०११ मा जापानमा ९।० म्याग्निच्युडको शक्तिशाली भूकम्पपछिको सुनामीका कारण झन्डै १८ हजार ५०० जनाको ज्यान गएको थियो वा बेपत्ता भएका थिए ।