-
काठमाडौं : आउँदो बिहिवार हुने प्रतिनिधि सभा चुनावको व्यवस्थापकीय तयारी अन्तिम चरणमा पुगेको निर्वाचन आयोगले जनाएको छ । निर्वाचन आयोगका सचिव कृष्णबहादुर राउतका अनुसार १ सय ६५ वटै निर्वाचन क्षेत्रमा मतपत्र सहित चुनाव गराउन चाहिने सबै सामग्री पुर्याइएको छ ।
कूटनीतिक समुदायका लागि आयोजित विशेष ब्रिफिङ कार्यक्रममा तयारीबारे जानकारी दिँदै सचिव राउतले चुनावलाई सुरक्षित र व्यवस्थित बनाउन २ लाख १५ हजार कर्मचारी परिचालन गरिएको जानकारी दिए। आवश्यक पर्ने कर्मचारीका लागि तालिम तथा अभिमुखीकरण पनि सम्पन्न भइसकेको छ ।
स्थानीय प्रशासन र सुरक्षा निकायको समन्वयमा मतदानस्थलमा सुरक्षाकर्मी परिचालनको काम पनि पूरा भएको छ । कूटनीतिक नियोगका प्रतिनिधिहरूको जिज्ञासा सम्बोधन गर्दै सचिव राउतले मतदान सकिएलगत्तै मतपेटिका सङ्कलन शुरु हुने र गणना शुरु भएपछि एक दुई दिनमै अन्तिम नतिजा आइसक्ने बताए ।
यस्तै कार्यक्रममा बोल्दै कार्यवाहक प्रमुख निर्वाचन आयुक्त रामप्रसाद भण्डारीले चुनावलाई स्वच्छ, स्वतन्त्र र विश्वसनीय बनाउन आयोग प्रतिबद्ध रहेको बताए । चुनावको समयमा फैलिन सक्ने भ्रामक सूचना, दुष्प्रचार र घृणास्पद अभिव्यक्ति विरुद्ध आयोगले कडा कदम चालेको उनले बताए ।
मतदानका लागि देशभर १० हजार ९ सय ६७ मतदान स्थल र २३ हजार १ सय १२ मतदान केन्द्रहरू तोकिएका छन् । साथै अस्थायी मतदाताहरूका लागि समानुपातिक निर्वाचन प्रणालीतर्फ मतदान गर्न १ सय ४३ वटा अस्थायी मतदान केन्द्रहरूको समेत व्यवस्था गरेको आयोगले जनाएको छ ।
