काठमाडौं : एमपक्स पुष्टि भएका बिरामी खतरामुक्त भएका छन् । शुक्रराज ट्रपिकल तथा सरुवा रोग अस्पतालमा उपचाररत व्यक्तिको स्वास्थ्य अवस्था खतरामुक्त रहेको अस्पतालले जनाएको छ । पुस ५ गते एमपक्स पुष्टि भएका उनको उपचार भइरहेको हो ।

उनको अवस्था सामान्य रहेको उपचारमा संलग्न छाला तथा यौनरोग विशेषज्ञ डा. शिवेन्द्र कुमार झाले बताए । ‘गत शुक्रबार मात्रै पत्ता लगायौँ । उहाँ भर्ना भइ उपचाररत हुनुहुन्छ । उहाँको अवस्था सामान्य नै छ,’ उनले भने, ‘उहाँ भर्ना हुन आउँदा धेरै घाउ थियो । शरीरको ५० भन्दा बढी भागमा घाउ देखिएको थियो । हातमा, पैतलामा, टाउकोमा, गुप्तअंगहरुमा घाउ देखिएको थियो । विस्तारै सुधार हुने क्रममा छ ।’

डा. झाका अनुसार एमपक्स भनेर उपचार नभएपनि यसमा ‘सर्पोटिभ कियर’ गर्न सकिने बताए । ‘यसमा स्याहार सुसारको कुरा आउँछ । त्यसमा जोड दिएका छौँ,’ उनले भने, ‘खानपिन, छाला स्याहारमा जोड दिएका छौँ ।’

एमपक्स लागेको निको हुन मोटामोटी समय २१ दिनसम्म लाग्छ । तर बिरामीको अवस्था अनुसार कति समय लाग्छ भन्ने यकिन भन्न नसकिने उनले रातोपाटीलाई बताए । ‘घाउमा भएको पप्रा निस्काने भएसी मात्रै डिस्चर्ज गरिन्छ,’ उनी भन्छन्, ‘उहाँलाई कतिसम्म समय लाग्छ यो हेर्नैपर्छ ।’

ती पुरुष विगत १० देखि ११ वर्ष साउदी अरब बस्दै आएका थिए । उनलाई एमपक्सको शंका लागेपछि नेपालमा उपचारका लागि आएको डा। झाको भनाई छ ।

उनी व्यक्ति नेपाली नागरिकमा पहिलो पटक एमपक्स सङ्क्रमण पुष्टि भएको स्वास्थ्य तथा जनसंख्या मन्त्रालयले जनाएको छ । साउदी अरबबाट बिहीबार नेपाल फर्केका एक पुरुषलाई गत शुक्रबार (पुस ५ गते) एमपक्स पुष्टि भएको मन्त्रालयका प्रवक्ता डा. प्रकाश बुढाथोकीले जनाएका छन् । गत १ असारमा एकजना विदेशी महिलालाई एमपक्स पुष्टि भएपनि नेपालीमा भएको यो पहिलोपटक हो ।