बेलायत : रसियाका ९ हजार सैनिक मारिएको युक्रेनले दाबी गरेको छ। युद्धमा दुवै देशले सैनिक मारेको दाबी गर्दै आएका छन्।

बुधवार रसियाको रक्षा मन्त्रालयले युक्रेनसँगको युद्धमा ४९८ सैनिक मारिएको र १५९८ जना घाइते भएको जनाएको थियो।

सैनिकतर्फको क्षतिमा युक्रेन र रसियाले फरक फरक तथ्याङ्क सार्वजनिक गरेका छन्। संयुक्त राष्ट्र सङ्घका अनुसार बुधवारसम्म २२७ युक्रेनी नागरिकको मृत्यु र ५२५ जना घाइते भएका छन्।

संयुक्त राष्ट्र सङ्घका अनुसार रुसी सेनाले युक्रेनको महत्त्वपूर्ण सहर खेरसन समेत कब्जा गरेको छ। मस्कोले युक्रेनको टुक्रिएको क्षेत्र डोनेस्क र लुहान्स्कलाई स्वतन्त्र राज्यको रूपमा मान्यता दिएको तीन दिनपछि रुसी सेनाले फेब्रुअरी २४ मा युक्रेनमा सैन्य कारबाही सुरु गरेको थियो।

बेलायत, अमेरिका, क्यानडा र युरोपेली सङ्घलगायत धेरै देशले युक्रेनमा रुसको सैन्य कारबाहीको निन्दा गरेका छन् र मस्कोमाथि प्रतिबन्ध लगाएका छन्।

यी देशहरूले युक्रेनलाई रुससँग लड्न सैन्य सहयोग गर्ने वाचा पनि गरेका छन्।

युक्रेनमा रुसले आक्रमण गरेपछि त्यहाँबाट करिब १० लाख मानिस पलायन भएका छन्।