काठमाडौं । सरकारले लकडाउन फेरी एक साताको लागि थप गरेको छ । अब लकडाउनको समयावधि २०७७ बैशाख ३ गतेसम्म कायम रहनेछ । आइतबार बसेको कोरोना भाइरस रोकथाम तथा नियन्त्रण सम्बन्धी उच्चस्तरीय समितिको बैठकले लकडाउन थप्नु पर्ने निर्णय गरेसँगै सोमबार बसेको मन्त्रिपरिषद् बैठकले लकडाउनको अवधी थप गरेको हो ।

यसअघि सरकारले पहिलो पटक चैत ११ गतेदेखि चैत १८ गतेसम्म लकडाउन गरेको थियो । त्यसपछि पनि कोरोना भाइरसको सन्त्रास नघटेको भन्दै पुनः चैत २५ गतेसम्म लकडाउन लम्ब्याएको थियो । अब योसँगै सरकारले लकडाउनको समय तेस्रो पटक थपेको हो ।

नेपालमा पहिलो पटक सुदूरपश्चिममा कोरोना भाइरसको कम्युनिटी ट्रान्समिसन देखिएसँगै यसको रोकथाम र नियन्त्रणमा चुनौती थपिएको छ । यसैलाई मध्यनजर गर्दै सरकारले केही दिनअघि लकडाउनलाई थप प्रभावकारी बनाउने भन्दै एउटा स्थानीय तहबाट अर्को स्थानीय तह र एक प्रदेशबाट अर्को प्रदेशमा आवतजावत गर्न समेत थप कडाई गरेको छ । नेपालमा अहिलेसम्म कोरोना संक्रमितको संख्या ९ पुगेको छ ।