काठमाडौं ।

सरकारले हरेक वर्ष सेनाका लागि मात्रै ४० अर्बको बजेट दिएको छ । त्यसबाहेक उसको आफ्नै कल्याणकारी कोष नै ३५ अर्बभन्दा बढीको छ । वार्षिक झण्डै एक खर्बको बजेट चलाउने सुरक्षा संगठनले एउटा ब्यारेकको पूर्वाधार समेत गैरसैनिक व्यापारिक गतिविधिमा लगाउन थालेको छ ।

काठमाडौंको बालाजुस्थित नेपाली सेनाको नम्बर १ बाहिनीसँगै बनेको भवन कामको शिलसिलामा काठमाडौं आएका सैनिकलाई बस्न बनाइएको ब्यारेक हो ।

सेना जस्तो संवेदनशिल सुरक्षा संगठनको ब्यारेक भवन निर्माणका लागि गरेको लगानी भवनमा मात्रै सीमित भएन । उसले सैनिक ब्यारेकको भवनमै १० वटा सटर निर्माण गरिदिएको छ, जसमा दुइ करोड २० लाख रूपैयाँ लगानी गरेको सेनाले यो सटरका लागि मात्रै एक करोड ३५ लाख खर्चिएको छ ।

नित्तान्त सैनिक गतिविधि हुने भवनमै सटर बनाउनु नित्तान्त व्यापारिक काम हो । सैनिक इलाका भएकै कारण पार्किङ निषेधित क्षेत्र भनेर सूचना टाँसिएको छ । तर त्यही स्थानमा आफैले चाहिँ दैनिक ग्राहकको घुइँचो लाग्ने गरी व्यवसाय चलाउन खोजेको छ । दिवंगत सैनिकका श्रीमतीलाइ व्यवसाय गर्न दिने तर्क सेनाको छ ।