काठमाडौं ।

खुलामञ्चको जग्गामा टहरा बनाएर भाडामा दिन नक्कली कागज बनाउनेदेखि बसपार्कको टावर ठेक्कामा समेत जोडिएका काठमाडौं महानगरपालिकाका प्रशासन प्रमुख ज्ञानेन्द्र कार्कीलाई संघीय मामिला तथा सामान्य प्रशासन मन्त्रालयमा तानिएको छ ।

३१ असारमा संघीय मामिला तथा सामान्य प्रशासन मन्त्रालयले महानगरपालिकालाई पत्र लेखी कार्कीलाई अर्को निर्णय नभएसम्मका लागि मन्त्रालयमा हाजिर हुन पठाउन पत्राचार गरेको थियो ।

भोलिपल्टै अर्थात साउन १ गते महानगरपालिकाका प्रमुख प्रशासकीय अधिकृत केदार न्यौपानेले कार्कीलाई मन्त्रालयमा हाजिर हुन जान तोक लगाए । कार्की भने कर्मचारीहरुमा लबिङ गरेका छन् ।

कांग्रेस निकट स्थानीय तह कर्मचारी युनियनको एउटा समूहले कार्कीलाई मन्त्रालयमा तानिए आन्दोलन गर्ने चेतावनी दिएको छ । युनियनका महानगर कमिटी अध्यक्ष कृष्ण सोती एक लाख सात हजार घुससहित दुई दिनअघि पक्राउ परेकाले युनियनका अर्का नेता हरि कुँवरले आन्दोलनको चेतावनी दिएका छन् ।