काठमाडौं ।

भूकम्प पीडितहरुबाट गैरकानुनी रुपमा रकम असुल गरेका प्राबिधिकहरुलाई कार्वाही गरिएको छ । प्राविधिकहरुको करार सम्झौता भंग गरी नियमानुसार कारबाही गरिएको हो।भूकम्प पीडितहरुलाई दुःख दिएको, स्थानीय तहका प्रमुख प्रशासकीय अधिकृतहरुको हस्ताक्षर किर्ते गरी हाजिर सिफारिस गर्ने गरेको उनीहरुलाई आरोप छ ।
कारबाहीमा पर्नेमा १२ जना इन्जिनियर, ५ जना सब–इन्जिनियर र २ जना असिस्टेन्ट सब–इन्जिनियर छन्। तीमध्ये नुवाकोटमा कार्यरत ८ जना प्राविधिक छन् भने काभ्रेपलाञ्चोकमा कार्यरत ३ जना, सिन्धुपाल्चोकमा कार्यरत २ जना, दोलखामा कार्यरत २ जना, धादिङमा कार्यरत २ जना छन्। त्यस्तै, भोजपुर र सोलुखुम्बुमा कार्यरत १–१ जना छन्।केन्द्रीय आयोजना कार्यान्वयन इकाइ र जिल्ला आयोजना कार्यान्वयन इकाइले दिएका निर्देशनहरु पालना नगरेका कारण उनीहरुलाई कारबाही गरिएको जनाईएको छ ।