काठमाडौैं । प्रधानमन्त्री कृषि आधुनिकीकरण परियोजनाबाट खरिद गरिएको चारवटा मोबाइल भ्यान खरिद गर्दा भ्रष्टाचार भएको भन्दै अख्तियारले १३ जनाबिरुद्ध मुद्धा दर्ता गरेको छ । अख्तियारले विभागका महानिर्देशक कर्ण, वरिष्ठ खाद्य अनुसन्धान अधिकृत पूर्णचन्द्र वस्ती, लेखापाल रविता श्रेष्ठ, नायब सुब्बा गुरुदत्त गौतम, शाखा अधिकृत भागिरथ आचार्य, प्रधानमन्त्री कृषि आधुनिकीकरण परियोजना व्यवस्थापन इकाई खुमलटारका उपसचिव (लेखा) गणेशप्रसाद चालिसेविरुद्ध भ्रष्टाचार मुद्दा दायर गरेको छ ।

त्यस्तै लेखापाल बालाराम पोख्रेल, तत्कालीन परियोजना निर्देशक नरहरिप्रसाद घिमिरे, वरिष्ठ कृषि इन्जिनियर सरोज अधिकारी, वरिष्ठ योजना अधिकृत तिलकराज चौलागाई, परियोजना निर्देशक लक्ष्मणप्रसाद पौडेल र वरिष्ठ अनुगमन मूल्याङ्कन अधिकृत इन्द्रहरि पौडेल र सप्लायर्स प्रुडेन्ट मेडिटेक इन्टरनेसनलका प्रतिनिधि प्रविण कुँवरविरुद्ध भ्रष्टाचार मुद्दा दायर भएको छ ।
विशेष अदालतमा अख्तियार दुरुपयोग अनुसन्धान आयोगले खाद्य प्रविधि तथा गुण नियन्त्रण विभागका महानिर्देशक सञ्जीवकुमार कर्णसमेत १३ जनाविरुद्ध विशेष अदालतमा भ्रष्टाचार मुद्दा दायर गरेको हो ।

खाद्य प्रविधि तथा गुण नियन्त्रण विभाग र प्रधानमन्त्री कृषि आधुनिकीकरण परियोजनाका लागि चार थान प्रयोगशाला मोबाइल भ्यान खरिद गर्दा सप्लायर्ससँगको मिलेमतोमा भ्रष्टाचार गरेको अख्तियारको आरोप छ । नेपाल सरकारलाई हानिनोक्सानी पुर्‍याई दुई पटकमा २४ करोड ८० लाख ९५ हजार हजार एक सय १६ रुपैयाँ हिनामिना गरेको अख्तियारको दावी छ ।