काठमाडौं ।

सरकारी कार्यालयहरुको हिसाब परीक्षण गर्न खटाइने अधिकृतहरुमध्येका एकजना अधिकृतमाथि प्रश्न उठेको छ । आदर्शवान कम्युनिष्ट मानिने मोहन वैद्य नेतृत्वको पार्टीनिकट कर्मचारी हुन् उनी, जसले एउटा सरकारी कार्यालयमा अर्बौंको बेरुजु भेटेपछि त्यसमा आफ्नालागि मोटो रकम कमिशनबापत खोजेको साउती चल्न थालेको छ । महालेखा परीक्षकको कार्यालयका अधिकृत शिवहरि पोखरेलको सन्दर्भ हो यो । पहिला राजश्व समूहमा थिए । त्यहाँ केही कैफियत देखिएपछि सुकदेव खत्रीको पालामा एनसेलको पुँजिगत लाभकर तिर्नुपर्ने भन्दै विभिन्न अनलाइनमा लेखे । त्यसपछि सञ्चार हेर्ने गरी नेपाल दूरसञ्चार प्राधिकरणमा सारिए । त्यहाँ गत वर्षको लेखा परीक्षणका क्रममा यति धेरै कैफियत भेटे कि, सोहीबमोजिमको एक–दुई लाखमा मात्र चित्त बुझाएनन्, झण्डै करोडको हाराहारीमा अपेक्षा गरेको पाइएपछि र त्यहीअनुसारको रिपोर्ट आएपछि कुरा छरपष्ट भयो । त्यसपछि महालेखा परीक्षक आफैँले उनीभन्दा तीन तह माथिसम्मका हाकिम क्रमशः पदम आचार्य, महेश्वर काफ्ले र सचिव बाबुराम गौतमलाई बोलाएर नोटिसमा राखे । यससम्बन्धमा दूरसञ्चार प्राधिकरणका हाकिमहरु र सञ्चार मन्त्रालयका सचिवसम्मलाई बोलाएर केरकारसमेत गरेको जनआस्थाले लखेको छ ।