काठमाडौं ।

सांसदहरूले लोकसेवा आयोगको विज्ञापन सच्याउनु पर्ने तर्क अघि सारेका छन् । लोकसेवाको विज्ञापन समावेशी नभएको तथा संघीयताको भावना विपरीत भएको भन्दै सच्याउन सांसदहरुले माग गरेका हुन्। सांसदहरूले स्थानीय तह र प्रदेशको अधिकारसमेत खोस्ने गरी आयोगले नौ हजार ९६१ कर्मचारी केन्द्रबाट किन माग गरेको हो भनेर प्रश्न गरेका थिए। प्रदेश र स्थानीय तहको कर्मचारी प्रदेश लोकसेवा आयोगमार्फत नै पदपूर्ति गर्ने व्यवस्था गर्न माग गर्दै सांसदहरूले सरकारले संविधानको मर्मअनुसार काम गर्न नसकेको आरोप लगाएका हुन्। नेपाली कांग्रेस र राजपाका सांसदहरूले लोकसेवा आयोगको उक्त विज्ञापनको विरोध गरेका हुन्।