काठमाडौं ।

स्वास्थ्य सेवाका कर्मचारीको समायोजन झन भद्रगोल भएको छ । सामान्यका कर्मचारीले अहिले १२ वटा समूह बनाएर काम गरिरहेका छन्, हालसम्म स्टाफ नर्सहरूको गुनासो हेर्ने काम सकिएको छ। अनमीको ५० प्रतिशत काम सकिएको छ। अहेवको अहिलेसम्म काम नै सुरु नभएको बताइएको छ।

पुल दरबन्दीको प्रस्ताव स्वास्थ्य मन्त्रालयले नपठाउँदा सरकारी चिकित्सकहरूको समायोजन रोकिएको बताईएको छ। स्वास्थ्य मन्त्रालयबाटै काम अघि नबढेपछि समायोजन प्रक्रिया अघि नबढेको हो। सामान्य प्रशासन मन्त्रालयले स्वास्थ्य मन्त्रालयबाट प्रस्ताव नआउँदासम्म चिकित्सकबारे केही गर्न नसकिने बताएको छ। यता, गुनासो व्यवस्थापन गर्ने कार्यमा खटिएको सामान्य प्रशासन मन्त्रालयले सातौँदेखि १०औँ तहसम्मको चिकित्सक समायोजनको कार्य भने अघि बढाएको छैन। यस्तै, संघीय मामिला तथा सामान्य प्रशासन मन्त्रालयले स्वास्थ्य समूहका कर्मचारीहरूको समायोजनमा परेको गुनासालाई आठवटा समूहमा बाँडेर सम्बोधन गर्ने प्रयास गरेको बताइएको छ ।