काठमाडौं ।

सरकारले जथाभावी विदेश भ्रमणमा रोक लगाउन कार्यविधि बनाए पनि त्यसको पालना भएको छैन । सरकारी कर्मचारीले तालिम र गोष्ठीको बहानामा पनि विदेश गएर राज्यकोषमाथि भार पार्दै आएका छन् । गत साउनयता संघीय मामिला मन्त्रालयबाट मात्रै ३ सयभन्दा बढी कर्मचारी विदेश भ्रमण गएका छन् ।

यस्तै अर्थ मन्त्रालयका १ सय २० कर्मचारीले विदेश सयर गरेका छन् । परराष्ट्र, वन, कृषि, उद्योग र रक्षा मन्त्रालय पनि धेरै कर्मचारी विदेश पठाउनेमा पर्छन् ।
सरकारी कर्मचारीमध्ये अहिले २० जना जापान, १२ जना अष्ट्रेलिया, ८० जना दक्षिण कोरिया र ९० जना चीनमा छात्रवृत्तिमा अध्ययनरत छन् ।

तिनीहरु शाखा अधिकृतदेखि सहसचिवसम्मका हुन् । गृह मन्त्रालयकी सहसचिव इन्दु घिमिरे शाखा अधिकृतका लागि अष्ट्रेलिया सरकारले प्रदान गरेको अष्ट्रेलियन अवार्डअन्तर्गत दुई वर्षे अध्ययनमा गएर भर्खरै नेपाल फर्केकी छन् । अध्ययनका अवसरमा उच्च तहका कर्मचारी नै पदीय मर्यादाको ख्यालै नगरी विद्यार्थी बनेर विदेश पुगिरहेका छन् ।