काठमाडौं ।

नेपाली कांग्रेसको महाधिवेशन आउन अझै दुई वर्ष बाँकी छ । तर पार्टीको भावी नेतृत्वमा स्थापित हुन उमेरले ७० पार गरेका दुई शीर्ष नेता सभापति शेरबहादुर देउवा र वरिष्ठ नेता रामचन्द्र पौडेलको देश दौडाहा भने अनौठो छ ।

नयाँ पुस्ताका नेताहरुले नेतृत्व हस्तान्तरणको मुद्दा जोडतोडका साथ उठाउन थालेपछि दुवै नेताले देश दौडाहा तिव्र पारेका हुन् । सभापति शेरबहादुर देउवाले चैतमा मात्र १४ भन्दा बढी जिल्ला पुगेर दर्जनौँ कार्यक्रम गरे ।
उमेरले ७२ नाघेका देउवा कतिपय ठाँउमा हिडेरै कार्यक्रम स्थलमा पुगे । यस्तै सक्रियता वरिष्ठ नेता रामचन्द्र पौडलेको पनि छ । ७४ वर्षिय पौडेल पनि चैतमा ८ भन्दा बढी जिल्ला पुगेर कार्यकर्ता आफुतिर तान्न प्रयास गरे । दुवैको दौडधुप आफ्नो धरातल नाप्न र पार्टी भित्रको मत आफुतिर तान्नेमा केन्द्रित छ ।

नेताद्वयको आगामी महिनाको भ्रमण तालिका पनि तय भैसकेको छ । बढ्दो उमेर र पार्टीभित्र नेतृत्व हस्तान्तरणको मुद्दा पेचिलो भइरहेका बेला देउवा र पौडेलले देखाएको सक्रियता आफ्नो वर्चश्व स्थापनामै मात्र केन्द्रीत छ । शिर्ष नेतृत्वको यो दौडाहालाई स्वाभाविक मान्ने तप्का भने पार्टीमा ठूलै छ ।

विद्यार्थीकालदेखि नै पार्टी राजनीतिमा समकालिन प्रतिस्पर्धी हुन् देउवा र पौडेल । पार्टीभित्र फरकफरक गुटको नेतृत्व गरिरहेका नेताद्वयका लागि पुस्तान्तरणको मुद्दाले भने झस्काएको छ ।