काठमाडौं ।

संघीय संरचना अनुसार कर्मचारी समायोजनाको काम सकिएको सरकारले जनाएको छ । संघीय मामिला तथा सामान्य प्रशासन मन्त्रालयले पत्रकार सम्मेलन गरी संघीय संरचना अनुसार कर्मचारी समायोजनको काम सम्पन्न भएको जनायो । केही प्राविधिक कर्मचारीहरू अभाव भए करारमा लिएर काम चलाउन प्रदेश र स्थानीय तहलाई पत्राचार गरिएको मन्त्री लालबाबु पण्डितले जानकारी दिए । कर्मचारी समायोजनमा सबैभन्दा बढी स्थानीय तहमा परिचालन गरिएको छ। स्थानीय तहमा ६६ हजार ९०८ जना कर्मचारी समायोजन गरिएको हो। त्यसैगरी प्रदेशमा २२ हजार ७९७ र संघमा ४८ हजार ४०९ कर्मचारी समायोजन गरिएको संघीय मामिला तथा सामान्य प्रशासन मन्त्रालयले जनाएको छ। सरकारले यही आर्थिक वर्षभित्र आवश्यक सबै कर्मचारीहरूको व्यवस्था गर्ने योजना पनि अघि सारेको छ। देशका विभिन्न स्थानीय तहमा कर्मचारीहरूको अभाव भइरहेको गुनासो आइरहेका बेला मन्त्री पण्डितले चालू आर्थिक वर्षभित्र आवश्यक सबै कर्मचारीहरूको व्यवस्था हुने गरी परीक्षा लिन लोक सेवा आयोगलाई निर्देशन दिएको पनि बताए। अब लोक सेवा आयोगले १५ देख २० हजार विभिन्न तहको कर्मचारीको लागि आवेदन खोल्ने बताइएको छ। लोक सेवा आयोगको परीक्षा पास गरेकाहरूबाट आवश्यक कर्मचारीको व्यवस्था गर्ने मन्त्री पण्डितको योजना छ।