काठमाडौं ।

नेपाली सेनामा थुप्रै अधिकृत दुईतारे जर्नेल बन्न पाइने अवसरहरुमा सामेल हुनबाट बञ्चित हुँदै कोही घर गइसके, कोही खुम्चिएर बसेका छन् । बर्दियामा माओवादीबाट १२ वटा एलएमजी (लाइट मेसिनगन) लगायतका हतियार खोस्ने र ४० जनालाई सोत्तर पार्ने नवल शाह २७ बेसिकका अधिकृत हुन् । ‘नेपालतारा’ नामक पदकमै सिमित भए तर नेशनल डिफेन्स (एनडिसी) कलेज तालिममा जान पाएनन् । उनीभन्दा एक ब्याच सिनियर, २६ बेसिकका रमेश थापामगरले ०६१ सालमा अर्घाखाँची र गुल्मीमा थुप्रै माओवादीलाई हताहत बनाए । महासेनानी पनि नपाई घर गए । ०५९ सालमा सैनिक नियम संशोधन गरेर वरिष्ठता, तालिमको मेरिट, शैक्षिक योग्यता, विदेश तालिम (स्टाफ कलेज) का आधारमा प्राथमिकता सूची तोकिएका कारण फिल्डमा ज्यान बाजी राखेर लडेकाहरुको यो दुर्गती भएको हो । भर्खर निस्किएको १२ जना एनडिसी गर्न जाने वैकल्पिकसहितको सूचीमा पनि यो झझल्को पाइन्छ । द्वन्द्वकालमा जंगीअड्डामै बसी नीति–नियम बनाउने, तालिम प्रशस्तै लिने र पत्राचार गर्ने तथा हाकिम रिझाउनेहरुले अहिले पनि अवसर पाइरहेको देखिन्छ ।
रविसिंह गर्तौला तीनपुस्ते जर्नेलका सन्तान हुन् । एम्बुसमा परेर ज्यान गुमाए । विदेश तालिम गएर बढी नम्बर पाउने, सशस्त्र द्वन्द्वकालमा फिल्डको मुखै नदेखेका पनि फास्टट्रयाकको बलमा उक्लिई हाकिमको नजरमा परेर अहिले एनडिसी (नेशनल डिफेन्स कलेज कोर्ष) मा छानिएका छन् । पाँच वर्ष अघिसम्म आठवटा कोटा हुन्थ्यो । अहिले थपिएर १२ पुगेको छ । बढ्नुको कारण हो, चीनले चारदेखि ६ वटासम्म दिनु । उक्त कोर्षका लागि अघिल्लो वरियताका दुई जनाले अमेरिका, त्यसपछिकाले क्रमशः बेलायत, भारत, पाकिस्तान र बंगलादेशको मौका पाउने गरेका छन् । बरिष्ठ महासेनानी र सहायक रथीहरुले ५२ वर्षको उमेर छँदासम्म यो अवसर पाउँछन् । छनौट बोर्डले पनि स्टाफ कलेजबाट अल्फा (ए) ग्रेड पाउनेहरुलाई मौका दिने गरेको छ । त्यसका लागि अंग्रेजी भाषाको टोफलमा कम्तिमा ७ दशमलव ५ स्कोर पु¥याएकै हुनुपर्छ । अलिअलि चलखेल भए पनि यदि कोही चौथो नम्बरमा परेको छ भने ऊ एक नम्बरमा आउने सम्भावना हुँदैन । एकजना छन्, प्रेमबहादुर पुन, प्रधानसेनापतिको सैनिक सचिव सचिवालयमा । २९ बेसिकका । उनको नाम एक नम्बरमा निस्किएर अमेरिका जाने कन्फर्म भइसक्यो । गुल्मीका हुन्, वीरेन्द्र र ज्ञानेन्द्र गरी दुबै राजाको दुई–दुई वर्ष एडिसी बसेका भलाद्मी र सोझा अफिसर । गजेन्द्र बोहोरा र राजु कार्कीजस्ता आजीवन एडिसी होइनन् । अहिलेका प्रधानसेनापति पूर्णचन्द्र थापा महासेनानी भएर विवेक शाह सैनिक सचिव भएको बेला समन्वयका लागि दुई वर्ष दरबारमा बस्दा प्रेमबहादुर मेजर थिए, दरबारमै । त्यसैबेला पूर्णचन्द्रको नजरमा परेका । त्यस्तै, सहायक रथी सुरेन्द्रसिंह रावल दुई नम्बरमा परेका छन् । पोहोरमात्र पिएचडी गरेका हुन् । उनी पनि अमेरिका जाने कन्फर्म भइसक्यो । अमेरिकाबाट स्टाफ कलेज गरेका २९ बेसिकका महासेनानी कृष्ण बिसी तीन नम्बरमा परेका छन् । १२ मध्ये राम्रो चलखेल गर्न सक्ने, हाकिम रिझाउन जान्ने, सम्पन्न परिवारका, गुल्मीका । चार नम्बरमा छन्, गोरखाली चोक ढकाल । २६ बेसिकका र पवन पाँडेको स्नेहले तीन वर्ष न्युयोर्क बस्ने मौका पाएका योगराज शर्मा छन्, पाँच नम्बरमा । फिल्डमा काम गरेकाहरुले भने भाषा र तालिमको कारण विदेश जाने मौका पाइरहेका छैनन् । त्यस्तो नियम संशोधन हुनुपर्ने माग उठिरहेको जनआस्थाले लेखेको छ ।