संघीय संसद् सचिवालयका ३१ कर्मचारीले समायोजन रोजेका छन् । कर्मचारी समायोजन ऐनले संघीय संसद्का कर्मचारीले समेत प्रदेश वा स्थानीय तहमा समायोजन हुन सक्ने व्यवस्था गरेपछि आठजना उपसचिव र २३ शाखा अधिकृतले समायोजन रोजेका हुन् । हाल संघीय संसद्मा चार सयभन्दा बढी कर्मचारी कार्यरत छन् । समायोजन ऐनअनुसार कार्यालय सहयोगीदेखि सहसचिवसम्मले समायोजन रोज्न पाउने व्यवस्था भए पनि संसद् सचिवालयका शाखा अधिकृत र उपसचिवले मात्रै समायोजन रोजेका हुन् ।

समायोजन ऐनअनुसार संसद्का कर्मचारीले समायोजन रोजेको सात दिनभित्र सरकारले समायोजन भएर खटिने कार्यक्षेत्रको टुंगो लगाइसक्नुपर्छ । समायोजन रोज्नेमध्ये अधिकांशले प्रदेशमा रोजेको र केहीले मात्रै स्थानीय तहमा रोजेका छन् । समायोजन रोज्ने उपसचिवहरूमा नेत्रबहादुर कार्की, नेत्र भट्टराई, रञ्जितकुमार यादव, रूपेश साह, डिल्ली रिजाल, सहजित राई, हरिहर पोखरेल र भोला दाहाल छन् ।