काठमाडौं ।

चिकित्सा विज्ञान राष्ट्रिय प्रतिष्ठान न्याम्समा उपकुलपतिको पद साउन २१ गतेदेखि खाली छ । रेक्टर, रजिष्ट्रार र डीन तथा न्याम्स अन्तर्गतको वीर अस्पतालमा निर्देशकको पद खाली भएको पनि सात महिना भयो । यति लामो समय नेतृत्वविहीन हुँदा वार्षिक योजना निर्माणदेखि कर्मचारी भर्ना र उपकरण तथा औषधि खरिदसम्ममा असर परेको छ । स्वास्थ्यमन्त्री उपेन्द्र यादव संयोजक रहेको समितिले उपकुलपतिमा नियुक्त गर्ने व्यक्तिको नाम प्रधानमन्त्री केपी शर्मा ओलीलाई साढे पाँच महिनाअघि सिफारिस गरेको थियो । समितिले असोज १ गते डीएन साह, ढुण्डीराज पौडेल र अजित रायमाझीमध्ये एक जनालाई उपकुलपति सिफारिस गरेको थियो ।

तर प्रधानमन्त्रीले अहिलेसम्म उपकुलपति नियुक्त गरेका छैनन् जसका कारण अन्य पदमा नियुक्तिको प्रक्रिया अगाडि बढेकै छैन । विभागीय मन्त्रीका नाताले स्वास्थ्यमन्त्री यादवले उपकुलपति नियुक्त गर्न प्रधानमन्त्रीलाई दबाब दिन सकेका छैनन् ।