• काठमाडौं ।

    शनिवारको दिन बैठक बसेर बढुवाको सिफारिस गरेको नेपाल प्रहरीको निर्णयमा एसएसपीको बढुवामा असन्तुष्ट जनाउँदै एक एसपीले राजीनामा दिएका छन्। यसरी राजीनामा दिनेमा एसपी नरेन्द्र उप्रेती रहेका छन्। महानगरीय अपराध महाशाखामा कार्यरत एसपी उप्रेतीले आइतबार नै राजीनामा दिने बताए । प्रहरी प्रधान कार्यालयले शनिबार डिएसपीलाई एसपीमा र एसपीलाई एसएसपीमा बढुवा गरेको थियो। एसपीबाट एसएसपी बन्ने १४ जनामा नपरेपछि उप्रेतीले राजीनामा दिने निर्णय गरेका हुन्। उनले आफूभन्दा जुनियरको बढुवा हुँदा पनि आफू नपरेको भन्दै असन्तुष्टि जनाएका छन्। उप्रेतीभन्दा जुनियर बढुवामा पर्ने अधिकृतहरूमा दीपक थापा, टेकप्रसाद राई र भीम ढकाल हुन्। २४ वर्ष प्रहरी सेवामा काम गरेका उनले संगठनले न्याय नदिएको बताए । उप्रेतीले यसअघि सिन्धुली, बारा, रसुवा, उदयपुरलगायतका जिल्लाको नेतृत्व गरेका थिए।