काठमाडौं ।

सर्वाेच्च अदालतले गम्भीर उजुरी परेको आधारमा ललितपुर जिल्ला अदालतका न्यायाधीश विश्वमंगल आत्रेय र तनहुँ जिल्ला अदालतका न्यायाधीश ओमकार उपाध्याय निलम्बन गरेको छ ।
आचरण विपरित कार्यसम्पादन गरेको र पदीय कर्तब्यबाट च्यूत भएको आरोपमा न्याय परिषद्ले छानबिन समिति गठन गरेलगत्तै उनीहरु निलम्बनमा परेका हुन् ।
आत्रेय र उपाध्यायका सम्बन्धमा छानबिनका लागि सर्वाेच्चका न्यायाधीश आनन्दमोहन भट्टराईको अध्यक्षतामा ३ सदस्यीय छानबिन समितिसमेत गठन भएको छ । यसलाई न्याय क्षेत्रको शुद्धिकरणको रुपमा हेरिएको छ ।
ललितपुर जिल्ला अदालत अनुगमनका क्रममा भिएलएनको नाममा अवैध रकम उठाएर ५ अर्ब रूपैयाँ ठगेको आरोप लागेका राम श्रेष्ठको मुद्दामा आत्रेयले चलाखी गर्न खोजेको भन्दै उनीमाथि अनुसन्धान भइरहेको थियो । प्रधानन्यायाधीश चोलेन्द्र शमसेर राणाकै निर्देशनमा आत्रेयमाथि सुक्ष्म ढंगले अनुसन्धान भइरहेको थियो ।
यस्तै आफ्नो आचारण सुधार नगरेको र परिषद्मा गम्भीर उजुरी परेपछि न्यायाधीश उपाध्यायलाई पनि न्याय परिषद् झिकाइएको थियो । विगतमा पनि कारबाहीमा परेका उपाध्यायमाथि न्याय सम्पादनका कर्ममा बिचलन देखिएको उजुरी परेको थियो ।

अन्य न्यायाधीशहरु राजेश काफ्ले र महम्मद जुनेद आजादलाई ७ दिने स्पष्टिकरण सोध्ने तथा अरु न्यायाधीशमाथिका उजुरीहरु तामेलीमा राख्नेसमेत निर्णय भएको छ ।
यस्तै काठमाडौं जिल्ला अदालतका श्रेष्तेदार कृष्णप्रसाद शर्मा नेपाललाई पर्सा जिल्ला अदालतको न्यायाधीशमा नियुक्तिका लागि सिफारिससमेत गरिएको छ । सत्तरी भन्दा बढी न्यायाधीश अहिले अनुसन्धानको घेरामा छन् । उनीहरुबिरुद्ध परेको उजुरीका आधारमा अनुसन्धान गरिरहेको सर्वोच्चस्रोतको भनाई छ । सुनकाण्डका फैसला गर्ने न्यायाधीश पनि अहिले निगरानीमै छन् । यी सवै कामले न्यायालयमा सुधारको संकेत देख्न सकिन्छ । तर, योसँगैका कामले भने सस्तो लोकप्रियताको लागि यी काम भईरहेको हो कि भन्ने प्रश्न पनि उत्तिक्कै उठेको छ ।

यी हुन् शुद्धीकरणका बाधक
प्रधानन्यायाधीश राणाले अदालतमा शुद्धीकरण उनकै वरिपरिबाट सुरु गर्नुपर्ने देखिन्छ । उनका वरिपरिका बिचौलियाहरु बलराम सापकोटा, मनोज शर्मा, उनकै भाइ प्रभुशमशेर राणाहरुलाई उनले अवहेलना मुद्दा दायर गरी सुरुवात गर्न सक्नुपर्छ ।
प्रधानन्यायाधीश राणा राष्ट्रपति समक्ष सपथ खान जाँदा उनीसँगै शितलनिवासमा मनोज शर्मा, नवराज थपलियाहरु पनि थिए । राणाको सपथमा उनीहरु कुन हैसियतले गएका हुन् ? न्यायालयमा हाक्काहाक्की विचौलिया प्रवेश गराएर न्यायालयलाई विवादमा ल्याउने पूर्वप्रधानन्यायाधीश दामोदर शर्माका भतिजा मनोज शर्माको काम नै पछिल्ला दिनमा मुद्दाको सेटिङ गर्ने हो । यो कुरा प्रधानन्यायाधीश राणालाई थाहा छ । दामोदर शर्माले अस्थायी न्यायाधीश बनाएका उनीहरुलाई पूर्वप्रधानन्यायाधीश कल्याण श्रेष्ठले स्थायी नबनाएपछि मनोज शर्माको काम नै मुद्दाको दलाली गर्ने हुँदैआएको छ । मनोज शर्माहरुलाई उनले मानहानी मुद्दा चलाएर शुद्धीकरणको सुरुवात गर्नसके मात्र उनको भनाइ र गराइमा एकरुपता पाइनेछ । राणाको छत्रछायाँमा मुद्दामा सेटिङ गर्दैआएका मनोज शर्माहरु त राणा प्रधानन्यायाधीश भएपछि उच्च अदालतको मुख्यन्यायाधीश र न्यायाधीश नियुक्ति पक्का भन्दै भोजभतेरमा ब्यस्त छन् ।
सर्वोच्च अदालतका कर्मचारीहरु नै बिचौलिया छन् भन्ने कुरा राणालाई थाहा छ । तिनलाई जागिरबाटै बर्खास्त नगरी किन कार्यसम्पादन तलमाथि गर्नुप¥यो ? बिचौलिया भनेर निधारमा लेखिएको हुँदैन । कुनै न्यायाधीशले कालु गुरुङ, बलराम सापकोटा जस्ता बिचौलियाले आफूलाई मुद्दामा प्रलोभन दिएको गुनासो गर्नुप¥यो । त्यो गुनासो कसले गर्ने ? गुनासो नै नगरी के आधारमा मानहानी मुद्दा लाउने ? फेरि न्यायाधीशले नै सुन पसले, मासु पसलेमार्फत् घुसको डिल गर्ने भएपछि कसरी बिचौलिया पहिचान गर्नसक्छन् ? अजय सुमार्गीको मुक्तिश्री सिमेन्टको नाममा विदेशबाट भित्रिएको शंकास्पद ८० करोड रुपैयाँ फुकुवा गर्ने बरिष्ठ न्यायाधीश दीपकराज जोशीलाई न्यायपरिषदको हवाला दिएर पेशी नतोक्ने, च्याम्बर खोस्नेदेखि प्रहरी लगाएर लखेटियो । तर, सुमार्गीकै स्याटेलाइट कम्पनीको नाममा आएको पौने ३ अर्ब रुपैयाँ शंकास्पद पैसा फुकुवा गर्न अन्तरिम आदेश दिने न्यायाधीश तेजबहादुर केसीलाई राणाले पेशी तोकिरहेकै छन् ।
उच्च अदालत बिराटनगरका मुख्य न्यायाधीश कुलरत्न भूर्तेलले ३८ क्वीन्टल सुनतस्करीमा थुनामा रहेका प्रहरीका पूर्व र बहालवाला भ्रष्ट अधिकारीदेखि तस्कर विमल पोद्दार र आरके ज्वेलर्सका राजेन्द्र शाक्यलाई जिल्ला अदालत मोरङको थुनछेक आदेश उल्टी गर्दै साधारण तारेखमा छाड्न निरन्तर सुनुवाइ राखे । सेटिङ गरी मुद्दा छरेर पेशी तोक्ने भूर्तेललाई केही नगरी साधारण तारेखमा छाड्ने पाँच न्यायाधीशलाई तानेर ठूलो हल्लाखल्ला मच्चाउने काम गरेका छन् । पाँच न्यायाधीशले जस्तै ३८ क्वीन्टल सुन तस्करीका आरोपी छाड्ने आदेश दिने उच्च अदालत बिराटनगरका न्यायाधीशद्वय जनक पाण्डे र साधुराम सापकोटालाई तानिएको छैन । सुनतस्करीका आरोपी छाड्न पेशी तोक्ने भूर्तेल, छाड्ने आदेश दिने पाण्डे र सापकोटालाई किन तानिएन ?

ललितपुर जिल्ला अदालतका न्यायाधीश विश्वमंगल आत्रेयलाई भीएलएनका संचालक राम श्रेष्ठलाई छाडेको आरोपमा तानियो । तर त्यसअघि तिनै राम श्रेष्ठलाई छाड्न आदेश दिने काठमाडौं जिल्ला अदालतका न्यायाधीश अमृत बस्नेतलाई खोई तानिएको ? आत्रेय र बस्नेतले एकै प्रकृतिको आदेश दिएका हुन् । तर आत्रेयलाई कारबाही हुँदा बस्नेतले कसरी उन्मुक्ति पाए ? नेपाल दूरसंचार कम्पनी(टेलिकम) सँग १ सय ५० भन्दा बढी कानुन ब्यवसायी र आफूलाई मन नपरेका कर्मचारी लगायतको कलडिटेल मागेको कुरा पनि आएको छ । जबकि पूर्वप्रधानन्यायाधीश कल्याण श्रेष्ठले ब्यक्तिको कलडिटेल माग्नु कानुन विपरीत भएको फैसला गरिसकेका छन् । यसर्थमा उनले कल डिटेल मागेका हुन् भने सर्वोच्च अदालतको आदेशको पनि विरुद्ध हुन्छ । प्रधानन्यायाधीश राणाकै छत्रछायाँमा नै बिचौलियाको खुलेआम प्रवेश अदालतमा थियो र छ ।