काठमाडौं ।

डिपोमा हुने गरेको इन्धन चोरी, नोक्सानी, ढिला गरी तेल बोकेका ट्यांकर आइपुग्नेलगायतका कैफियतलाई सूक्ष्म रूपले बुझेर सुधार गर्न आयल निगमका प्रबन्ध निर्देशक सुरेन्द्र पौडेल केही दिन डिपोमा बस्ने भएका छन् ।
निगममा पहिलोपटक खुला प्रतिस्पर्धाबाट प्रबन्ध निर्देशक नियुक्त भएका पौडेलले डिपोमा सुधार हुन सके निगमभित्रको धेरै बेथिति अन्त्य गर्न सकिने निष्कर्ष निकालेका छन् । कर्मचारीहरूसँग भएका छलफलमा उनले डिपोबाट हुने कारोबारलाई पारदर्शी बनाउन निर्देशन दिने गरेका छन् ।
डिपोमा बसेर इन्धनको लोड–अनलोडिङलाई नियाल्नु पनि स्वाभाविक कामको रूपमा लिएको उनले बताएका छन् ।

निर्देशक पौडेलले निगमभित्र सुधार गर्नु आफ्नो चुनौती भएकाले सफल भएर देखाउने बताउने गरेका छन् ।  । निगमको डिपोमा आइओसीबाट लोड भएका ट्यांकर समयमै नल्याई बीचबाटोमै रोक्ने, चालक र ढुवानी व्यवसायीसँग मिलेर तेल चोरी गर्ने, प्राविधिक नोक्सानीको तोकिएको दरभन्दा बढी लक्ष्य देखाइ अनियमिता गर्ने, डिपोमा इन्धन स्टक नराख्नेलगायतका समस्या छन्  । निगमको काठमाडौं, अमलेखगन्ज र विराटनगर ठूला डिपोमध्येमा पर्छन् । त्यसपछि भैरहवा, नेपालगन्ज र पोखरा डिपो पर्छन्  ।

डिपो प्रमुखले पम्प व्यवसायीलाई मागेजति तेल नदिएर दुःख दिने गरेको आरोप लाग्ने गरेको छ । मागेजति तेल पाउन डिपो प्रमुखलाई कमिसन खुवाउनुपर्ने बाध्यता रहेको व्यवसायीले बताउँदै आएका छन्  । यस्ता बिकृति हटाउन पनि डिपोमा कार्यालय स्थापना गरेर बस्ने पौडेल योजना बनाएका हुन् ।