काठमाडौं ।

मेलम्ची खानेपानी आयोजनाको गाडी प्रयोग गर्नेमा सेनाका हाकिमदेखि पुलिसका हाकिम हुँदै राजनीतिक दलका नेतासम्मले दुरुपयोग गरेको भेटिएको छ ।

खानेपानीमन्त्री बिना मगरले अन्यत्र प्रयोग भईरहेको मेलम्ची आयोजनाको गाडी तत्काल फिर्ता ल्याउन मेलम्ची खानेपानी विकास समितिलाई निर्देशन दिएकी छन्। ईलाका प्रहरी कार्यालयदेखि सेनाको ब्यारेकले पनि खानेपानी कार्यालयको गाडी दुरुपयोग गरिरहेको तथ्य वाहिर आएको छ ।

समितिका अनुसार प्रधानमन्त्री कार्यालयले मेलम्चीका दुई वटा गाडी लगेको थियो। एउटा गाडी प्रधानमन्त्री कार्यालयबाट भूमि व्यवस्था, सहकारी तथा गरिबी निवारण मन्त्रालयमा लगिएको छ। बा १ झ ८७५९ नं को टोयोटा प्राडो जीप प्रधानमन्त्री कार्यालयबाट भूमि व्यवस्था मन्त्रालय लगिएको हो। त्यस्तै बा १ झ ८९९५ नम्बरको टोयोटा प्राडो जीप समेत प्रधानमन्त्री कार्यालयमा रहेको छ।

मेलम्ची आयोजनाका लागि खरिद गरिएका ६० वटा गाडीमध्ये मेलम्ची र खानेपानी मन्त्रालय बाहेक अन्यत्र ६ वटा गाडीहरु प्रयोग भएका छन्।

बा ८ च ६७६० नं।को टोयोटा ल्याण्डक्रुजर जीप सहरी विकास मन्त्रालयमा छ। मन्त्रालयले उक्त गाडी २०६२ साल चैतदेखि प्रयोग गरिरहेको छ। सो गाडीमा हालै प्रधानमन्त्री कार्यालयमा सरुवा भएका सचिव दीपेन्द्रनाथ शर्मा चढ्ने गरेका छन्।

काठमाडौं उपत्यका विकास प्राधिकरणले मेलम्ची आयोजनाको बा १ झ ८७६३ नं। को प्राडो जीप प्रयोग गरिरहेको छ। प्राधिकरणले २०७० साल जेठ देखि उक्त गाडी प्रयोग गरिरहेको हो।

त्यस्तै सहरी विकास मन्त्रालयमा प्रयोग भईरहेको बा १ झ ७१९४ नं। को मारुती कार र क्षेत्रीय प्रशासन कार्यालय हेटौंडामा प्रयोग भईरहेको बा ४ च १५०३ नं को गाडी समेत फिर्ता ल्याउने प्रक्रिया अघि बढाउन मन्त्रालयले निर्देशन दिएको छ।