काठमाडौं : बेलायतको दक्षिण वेल्समा डढेलो नियन्त्रणमा गोर्खा सैनिकलाई खटाइएको छ । डढेलो नियन्त्रणमा उनीहरूले ‘अभूतपूर्व काम’ गरेको भन्दै अहिले बेलायतमा उनीहरूको प्रशंसा गरिएको छ ।

मुख्य अग्नि नियन्त्रण अधिकृत फिन मोनाहानले वेल्स फायर एन्ड रेस्क्यु सर्भिस अत्यधिक दबाबमा रहेको बेला मदतको लागि आएको सेनाले अभूतपूर्व कार्य गरेको भन्दै प्रशंसा गरेका हुन् ।

वेल्समा लागेको डढेलो नियन्त्रण गर्न ‘क्विन्स ओउन गोर्खा लजिस्टिक रेजिमेन्ट’का करिब २०० जना गोर्खा सैनिक, २२ रोयल इन्जिनियर्स, रोयल लजिस्टिक्स कर्प्स र सेनाका हेलिकोप्टरहरूको सहयोग लिइएको थियो ।

मोनाहानले डढेलो नियन्त्रण गर्न आफ्ना अग्नि नियन्त्रकहरूसँग अत्यन्तै विशिष्ट सीपहरू रहेको र गोर्खा सैनिकको सहायताले ती सबै सीपलाई सही ठाउँमा केन्द्रित गर्न सक्षम बनाएको जनाएका छन् ।

सैनिकहरूले अग्नि नियन्त्रक र विशेषज्ञ उद्धारकर्ताहरूलाई पानी उपलब्ध गराउनेदेखि बन्दोबस्ती (लजिस्टिक) सहयोगमा सघाएका थिए ।

मोनाहानले सैनिकहरूले खाडल खन्ने र अग्नि रोधक रेखा बनाउन मदत गरेर अत्यन्तै अभूतपूर्व काम गरेको बताएका छन् ।

दक्षिण वेल्समा आइतबार करिब १४ वटा छुट्टाछुट्टै आगोका घटना नियन्त्रण गर्ने प्रयास भएको थियो । बीबीसी