काठमाडौं : चीनको न्यालम–खासा क्षेत्रको सीमावर्ती वनमा डढेलो लागेपछि नेपाल–चीन उत्तरी व्यापारिक नाका तातोपानी पूर्ण रूपमा बन्द गरिएको छ । चिनियाँ प्रशासनले सुरक्षा जोखिम बढेको भन्दै नाकाबाट हुने सम्पूर्ण आवतजावतमा रोक लगाएको हो ।

अस्ति आइतवारति न्यालम र खासाको मध्यभागसहित ‘छोबिन’ क्षेत्रमा शुरु भएको आगलागी र डढेलो हिजो बेलुकासम्म पनि नियन्त्रणमा नआएपछि नाका बन्द गर्ने निर्णय गरिएको इलाका प्रहरी कार्यालय कोदारीका प्रहरी निरीक्षक जगतबहादुर राईले जानकारी दिए।

स्थानीय तथा पर्यटक आवतजावतसँगै मालबाहक गाडीको आवागमन बन्द गरिएको उनले बताए। अघिल्लो वर्षको बाढीले रसुवा नाका बन्द भएपछि चीनसँगको अधिकांश व्यापार तातोपानी नाकामार्फत हुँदै आएको छ ।

हिजोदेखि नाका बन्द भएपछि सामान बोकेका कन्टेनर रोकिएर समस्या भएको नेपाल ट्रक कन्टेनर मजदुर सङ्घका अध्यक्ष अर्जुन सापकोटाले बताए ।