युरोपेली नेताहरूले युक्रेनको सिमाना बलपूर्वक परिवर्तन गर्न नहुने बताएका छन् । युक्रेन युद्धलाई लिएर अलास्कामा अमेरिका–रुस शिखर सम्मेलन हुन लागेको दुई दिनअघि युरोपेली नेताहरूले युक्रेनी सीमानाहरू बलपूर्वक पुनः कोरिनेविरुद्ध चेतावनी दिएका बीबीसीले जनाएको छ ।

युक्रेनका नागरिकलाई आफ्नो भविष्यको निर्णय गर्ने स्वतन्त्रता हुनुपर्ने उनीहरूले विज्ञप्तिमा उल्लेख गरेका छन् । युरोपेली नेताहरूले युक्रेनमाथि रुसी आक्रमण अन्त्य गर्न, युक्रेनका लागि न्यायपूर्ण र स्थायी शान्ति तथा सुरक्षा प्राप्त गर्न अमेरिकी राष्ट्रपति डोनाल्ड ट्रम्पको प्रयासलाई स्वागत गरेको बताएका छन् ।

विज्ञप्तिमा २७ मध्ये २६ जना नेताले हस्ताक्षर गरेका छन् । हस्ताक्षरकर्ताहरूमा हङ्गेरीका नेता भिक्टर ओर्बानको नाम छैन । उनले रुससँग मैत्रीपूर्ण सम्बन्ध कायम राखेका र युक्रेनलाई युरोपेली सङ्घ (ईयू) को समर्थन रोक्न बारम्बार प्रयास गरेको खबरमा उल्लेख छ ।

युरोपेली देशहरूमा रक्तपातपूर्ण युद्धहरूद्वारा सिमाना पुनः कोरिएको लामो इतिहास छ र अमेरिकाले युक्रेनमा त्यसो हुन दिने सम्भावनाप्रति युरोपेली नेताहरू अत्यन्त चिन्तित छन् ।

बल प्रयोग गरेर कब्जा गरिएका क्षेत्रहरूमा रुसको सार्वभौमिकताको कानूनी मान्यता ईयूलाई अस्वीकार्य छ । यद्यपि अहिले रुसी नियन्त्रणमा रहेका केही युक्रेनी क्षेत्रहरू किभमा फर्कन नसक्ने धारणा बलियो बन्दै गएको छ ।