सिन्धुपाल्चोक । 

बाह्रबिसे–तातोपानी सडकखण्डका बिभिन्न स्थानमा  भासिएर अवरुद्ध भएको १५ दिन बढी भईसकेको छ । 

कोप्लाङ भन्ने ठाउँमा सडक भासिँदा तातोपानी नाका ठप्प भयो ।  भोटेकोशी गाउँपालिका–२ कोप्लाङमा १५ फिट भासिएर अवरुद्ध बनेको नाका जोड्ने कोदारी राजमार्ग अहिलेससम्म सञ्चालनमा आउन सकेन । 

यातायात अवरुद्ध हुँदा करोडौँ मूल्यका सामग्री बोकेका सयौं कन्टेनर लिपिङ बजारक्षेत्रमा रोकिएको नेपाल हिमालय सीमापार वाणिज्य सङ्घका वरिष्ठउपाध्यक्ष गङ्गाबहादुर घिमिरे ‘सागर’ ले बताए । ठूला भारका कन्टेनर पार हुने अवस्था नभएकाले नाकाका व्यवसायीलाई समस्या परेको घिमिरेको भनाई छ ।  

यसको अन्य वैकल्पिक मार्ग नि नभएका कारण मानिसहरूलाई माईती मावली आउजाउ गर्न पनि समस्या परिरहेको छ । अहिले स्थानीय तह पनि जुटेर काम गरिरहेको भोटेकोशी–२ का वडाध्यक्ष कुमार श्रेष्ठले बताए । 

अन्य स्थानमा पनि सडक अवरुद्ध छ । बैशाखमै समस्या आएपछि व्यवसायीलाई समस्या परिरहेको सिन्धुपाल्चोक उद्योग वाणिज्य सङ्घका अध्यक्ष बुद्धराज बस्नेत बताउँछन् । 

चीन तर्फबाट थोरै मालबाहक गाडी छोडिएको छ । झन् नेपालतर्फ बाटो अवरुद्ध भएपछि व्यवसायी थप पीडामा परेको घिमिरेको भनाई छ । 
सामान ढिलो आउनु र सडक अवरुद्ध हुनुले लगानी बढिरहेको व्यवसायीहरूको भनाई छ । यसअघि सडकका कारण लामो समय कन्टेनर बाटोमा थन्किँदा बैङ्कको ब्याज, गोदाम भाडा र कर्मचारीका तलबका कारण सयौँ व्यवसायी पेसाबाट पलायन भएका थिए । 
यसबाहेक चीनले खासा र यहाँसम्म पुग्ने करिब ७ किमि सडक र सुरुङ मार्ग निर्माण गरिरहेकाले समयसमयमा कन्टेनर आउजाउमा ढिलाइ हुने गरेको छ ।

यस आर्थिक वर्षमा २१ अर्ब ८२ करोड राजस्व सङ्कलनको लक्ष्य राखिएकोमा करिब पूरा भएको छ, गएको पुसमा मात्रै एक अर्ब ८४ करोड राजस्व उठेको थियो । 

‘राज्यले खासै ध्यान नदिएको कारण समस्या’ 
गङ्गाबहादुर घिमिरे ‘सागर’
बरिष्ठउपाध्यक्ष, हिमालय सीमापार वाणिज्य संघ

तातोपानी नाका व्यवसायका लागि छोटो रुट हो । चीन र नेपालबीच हुने व्यापार हुने यो नाका सँधै राज्यको उपेक्षामा छ । हेर्नुस् न, बैशाखमै आएको बाढीले सडक अवरुद्ध भयो । बिग्रेको बाटो हेर्ने हो भने दश मिटर पनि छैन । जम्मा पाँच किलोमिटर बाटो स्तरीय बनाइदिने हो भने सहज हुन्छ । तर, यो विषयमा राज्यको माथिल्लो निकाय जिम्मेवार देखिएन । भौतिक तथा पूर्वाधार मन्त्रालयदेखि सडक विभागसम्म पटक पटक बिन्ती गरेका छौँ । हुन्छ भन्ने   आश्वासन वाहेक  भएन ।  अन्तर्राष्ट्रिय नाका हो । सन्देशको हिसाबले पनि जागरुक हुनुपर्ने हो । 

उत्तरी नाका उपेक्षामा छ । वार्षिक २२ अरब रुपैयाँको लक्ष्य अनुसार राजस्व सङ्कलन भइरहेको छ । तर, सडकमार्ग स्तरोन्नतिमा   कुनै सरकारको ध्यान गएन । राजस्वको लक्ष्य पूरा गर्न पर्ने सामान  खासा र नेलममा थन्किएको छ । अब झन् वर्षा लागि सक्यो । झन् समस्या आउँछ ।

नाका मात्र होइन । यहाँ त मानवीय संवेदनाका कुराहरू पनि छन् । यहाँ बसोवास गर्ने स्थानीय समुदायको माइती मावली आवतजावत गर्न पनि समस्या भएका छन् । मानिस बिरामी भएभने हेलिकप्टर लिएर जानुपर्ने अवस्था छ । पैसा हुनेले हेलिकप्टर लैजालान् । गरिवहरु के गर्ने ? त्यसकारण यो नाकाको सडक मार्ग स्तरोन्नती गर्न लाग्नु पर्दछ ।