काभ्रेपलाञ्चोक । प्रहरीले बनेपाको विभिन्न होटलबाट करीब दुई हजार ५०० लिटर घरेलु मदिरा बरामद गरेको छ । इलाका प्रहरी कार्यालय बनेपाका इन्चार्ज प्रहरी निरीक्षक योगेन्द्र तिमल्सिनाको टोलीले सोमबार साँझ उक्त परिमाणको अवैध घरेलु मदिरा बरामद गरेको हो ।

बनेपाका होटलमा अवैधरुपमा घरेलु मदिरा बिक्री गरिरहेको जानकारी पाएपछि ‘समुदाय–प्रहरी साझेदारी’ अवधारणाअन्तर्गत होटलको अनुगमन गरिएको प्रहरी निरीक्षक तिमल्सिनाले बताउनुभयो । उहाँका अनुसार बरामद गरिएको होटललाई ‘आइन्दा घरेलु मदिरा बिक्री–वितरण नगर्न’ सचेत गराइएको छ ।

बरामद मदिरा स्थानीय जनप्रतिनिधिको उपस्थितिमा बनेपा नगरपालिका–५ चप्लेटीमा नष्ट गरिएको छ । प्रनि तिमल्सिनाले बनेपा नगरलाई घरेलु मदिरामुक्त बनाउन अनुगमनलाई तीव्रता दिइने बताउनुभयो ।

यसैगरी बनेपामा सुरक्षा एवं अवैध सामग्री बिक्रीवितरमा प्रहरीले निगरानी बढाएको छ । प्रहरीले गतसाता बनेपा बसपार्क र चाँदनीचोकस्थित मोबाइल पसलबाट राजश्व छलिएका ३० थान ब्राण्डेड मोबाइल सेट बरामद गरी पसल सञ्चालकलाई नियन्त्रणमा लिएको थियो ।

“विनादर्ता पसलमा राजश्व छलेका मोबाइल विक्री भइहेको सूचना प्राप्त भएको छ, यसमा विशेष निगरानी बढाएका छौँ”, प्रनि तिमल्सिनाले भन्नुभयो । उहाँका अनुसार बनेपा राजधानी भित्र्याइने राजश्व छलेका मोबाइल सेटको एउटा ‘ट्रान्जिट प्वाइन्ट’ नै पाएपछि निगरानी बढाएर पसल सञ्चालकलाई खरीद–बिक्रीको बिलबिजक साथमै राख्न आग्रह गरिएको छ । रासस