काठमाडौं ।
सिन्धुको पानी स्थानीयकै लगानी भन्ने अवधारणा अनुसार निर्माण प्रकृया सुरु भएको ५२ मेगावाटका दुई आयोजनालाई उत्पादन अनुमति मिलेको छ ।

सिन्धुकै स्थानीय जनतालाई लगानीको वातावरण तयार गर्ने यो आयोजनालाई विद्युत् विकास विभागले अनुमति प्रदान गरेको हो । आयोजना सिन्धुपाल्चोकको जुगल हिमाल नजिकै बन्न लागेको हो ।

५२ मेगावाटको ब्रम्हायणी र अपरलाई सानिमा बैंकको नेतृत्वमा ६ वटा बैंकले लगानी गर्ने सम्झौता भईसकेको छ । उक्त आयोजनाको लागत अनुमान १० अर्ब ३४ करोड छ । यो रकम बैंकहरुले प्रमुख रुपमा लगानी गरेपनि सिन्धुपाल्चोकका सवै निम्न बर्गका मानिसहरुले यसमा लगानी गर्ने बतावरण तयार गर्न लागिएको छ ।

विद्युत् विकास विभागले उक्त दुई आयोजना ३६.५२ मेगावाट र १५.१५ मेगावाटको उत्पादन लाइसेन्स दिएको हो ।

ब्रह्मायणी हाइड्रो कम्पनी र इन्टिग्रेटेड हाइड्रो फन्डले जुगल गाउँपालिकाको तेम्बाथान क्षेत्रमा निर्माण गर्ने उक्त दुई आयोजनामा ब्रह्मायणी खोलाको पानी प्रयोग गरेर बिजुली उत्पादन गरिनेछ । दुवै आयोजनाको विद्युत खरिद सम्झौता (पीपीए) भइसकेको छ ।

०८४ सालमा निर्माण पूरा गर्ने लक्ष्य राखिएको आयोजनाको सुरुङ करिब ६ किमि र अपरको १.४ किमि हुने छ । आयोजानका लागि अर्डिट मार्ग, क्याम्प, बंकरलगायत संरचना बनिसकेका छन् ।

पानीको स्रोत र डिजाइनका हिसाबले आयोजना सस्तो हुने र बर्सेनि दिने आम्दानी पनि आकर्षक रहेको कारण सिन्धुपाल्चोकका निम्न वर्गलाई लगानीको लागि प्रारुप तयार भएको अध्यक्ष भरत पराजुलीले बताए । त्यसका लागि सिन्धुपाल्चोक जिल्लावासीलाई प्रोमोटर सेयर लगानी गर्न आह्वान गरिएको छ ।

सिन्धुपाल्चोकमा धेरै जलबिद्युत आयोजनाहरु छन् । तर, तिनीहरुको स्थानीयको मनग्ये लगानी छैन । यो आयोजनामा यस क्षेत्रका हरेक नागरिकलाई समावेश गराईने योजना छ ।

सम्मृद्ध नेपाल र सुखी नेपालीको अवधारणा तयार गर्न पनि स्थानीय हरेक नागरिकले यो आयोजनामा लगानी गर्न आवश्यक रहेको पराजुलीको भनाई छ । अहिले हाईड्रो नै आम्दानीेको प्रमुख स्रोत हुने भएका कारण पनि ग्रामीण क्षेत्रका वासिन्दालाई यो आयोजनामा लगानी गर्न आकर्षण गर्ने योजना वनाइएको आयोजनाले जनाएको छ ।