काठमाडौं । नेपाली र चिनियाँ अधिकारीहरुबीच ल्हासामा भएको बैठकपछि तातोपानी नाका चैत्र १८ देखि पूर्ववत सञ्चालनमा आउने भएको छ ।

दुई पक्षबीच भएको छलफलपछि जारी बिज्ञप्तिमा सो कुरा उल्लेख गरिएको छ ।

चीनको तिब्बत स्वायत्त क्षेत्र ल्हासामा नेपालका उद्योग, वाणिज्य तथा आपूर्ति मन्त्रालयका सचिव मधुकुमार मरासिनी र चीनको तिब्बत स्वायत्त क्षेत्रको जनसरकारका कार्यकारी उपाध्यक्ष चेन योङ्छीले वार्ता टोलीको नेतृत्व गरेका थिए ।

सो बैठकमा सीमा पारी व्यापार र जनताबीचको आवतजावतलाई अधिकतम स्तरमा सुचारु गर्ने र भूमि बन्दरगाहको सहज सञ्चालन, व्यापार सहजीकरण, भन्सार सहयोग, सीमा क्षेत्र विकास, व्यापारसँग सम्बन्धित पूर्वाधारलगायत सीमा व्यापार र सहकार्यमा सहयोगका नयाँ बाटो खोज्ने विषयमा छलफल भएको विज्ञप्तिमा उल्लेख छ ।

दुवै पक्षले २०२३ अप्रिल १ (१८ चैत २०७९) गतेदेखि रसुवागढी र केरुङ निकास र प्रवेशद्वारलाई दुईतर्फी व्यापार र जनता–जनताको आवतजावतका लागि पूर्णरुपमा सञ्चालन गर्ने सहमति गरेका छन् । तातोपानी र झाङ्मु हुँदै दुईतर्फी व्यापार र मानव आवागमन मे १, २०२३ (१८ वैशाख २०८०) देखि सूचारु हुनेछ ।