हेटौंडा ।

सामान्य रोगको समेत उपचार गराउन नसक्दा अकालमै मृत्युबरण गर्नु पर्ने बाध्यताबाट मुक्ति दिन गाउँपालिकाको लगानीमा १०८ परिवारका ५०५ जनाको निःशुल्क स्वास्थ्य बीमा गरिएको छ । मकवानपुरको भिमफेदी गाउँपलिकाका १०८ परिवार चेपाङ समुदायको स्वास्थ्य बीमा गरिएको हो ।

बीमा भदौंबाट लागू हुने गाउँपालिका कार्यालयले ४ लाख १९ हजार रुपैयाँ लगानी गरेको हो ।
बीमा गरिएका परिवारलाई गाउँपालिकाले बीमा कार्ड हस्तान्तरण गरेको छ । गाउँपालिका वडानम्बर(२ कार्यालयबाट बीमा गरिएका परिवारको सदस्यलाई गाउँपालिकाका अध्यक्ष हिदम लामालगायतले परिचय पत्र बितरण गरेका थिए ।

संकलित तथ्याङकअनुसार गाउँपालिकाको ५ र ८ नम्बर वडा बाहेक अन्य सबै वडामा चेपाङ समुदायको बासोबार रहेको छ ।

अध्यक्ष हिदम लामाका अनुसार १ मा २६ परिवारमा ७५ जना, २ मा २० परिवारको ८३ जना, ३ मा ४ परिवारको १५ जना, ४ मा ८ परिवारका २५ जना, ६ मा २५ परिवारको १३७ जना, ७ मा १ परिवारको २१ जना र ९ मा २७ परिवारको १३९ जना चेपाङहरुको स्वास्थ्य बीमा गरिएको छ ।

परिचय पत्र बितरण गर्दै गाउँपालिका अध्यक्ष हिदम लामाले बिमाको कार्डलाई सिरानीमा राखेर परम्परागत धामि झाँक्रीको भरमा नपर्न चेपाङ समुदायलाई आग्रह गरे ।