काठमाडौं । आफ्नै चालकले मानव तस्करीको आरोप लगाएपछि अस्ट्रेलियका लागि नेपाली राजदूत लक्की शेर्पाले राजीनामा बुझाएकी छिन् । शेर्पाले विज्ञप्ति निकाल्दै आफ्नो पदबाट राजीनामा दिएकी हुन्। विज्ञप्तिमा उनले आफ्नाबारे ‘न्यायिक फैसला’ हुने अपेक्षासहित राजीनामा दिएर बाटो खोलिदिएको उल्लेख गरेकी छिन्। आफूमाथि लागेका आरोपको खण्डन गरेकी छिन् ।
‘हामीमाथि संगिन र आधारहीन आरोप लगाउनु भन्दा अगाडि एकचोटी घोत्लिएर सोच्नु जरुरी छ, मेरो जीवनको करियरको सुरुवात नै मानव तस्करीविरुद्धको अभियानबाट सुरु भएको हो,’ उनको विज्ञप्तिमा भनिएको छ, ‘गाउँको दुरदराज, झुपडीदेखि अन्तराष्ट्रिय मञ्च हुँदै नीतिनिर्माण तहसम्म भूमिका रहेको छ। कैंयौँ पीडितहरुलाई नयाँ जीवन जिउने आधार दिएको छु। दुखेको घाउमा मल्हमपट्टी लगाउने काम गरेकी छु।’ विज्ञप्तिको केही बुँदामा उनी भावुकसमेत बनेकी छिन्।