काठमाडौं : राष्ट्रिय स्वतन्त्र पार्टी (रास्वपा) का मुख्य सचेतक कविन्द्र बुर्लाकोटीले प्रधानमन्त्री बालेन्द्र शाह सम्भवतः एक हप्तामै संसदमा उपस्थित हुने बताएका छन् ।

आफूले प्रधानमन्त्रीको सचिवालयमा कुरा पनि गरेको भन्दै बुर्लाकोटीले सम्भवतः एक हप्ताभित्रै प्रधानमन्त्री संसदमा आउने कुरा सभामुखमार्फत सदनलाई जानकारी गराउन चाहेको बताए ।

प्रधानमन्त्रीले संसदमा उठेका प्रश्नहरूको जवाफ दिनुपर्ने माग गर्दै प्रमुख प्रतिपक्षी दल कांग्रेस, एमाले र नेकपासहितका राजनीतिक दलहरूले प्रतिनिधिसभाको बैठक अवरुद्ध गरिरहेका छन् ।

आजको बैठकमा पनि प्रतिपक्षी दलले बैठकमा अवरोध जनाएपछि बैठक स्थगित गरेर सभामुख डोलप्रसाद अर्यालले दलका सचेतकहरूसँग छलफल गरेका थिए । छलफलमा रास्वपाले सदनमा प्रधानमन्त्री आउने प्रतिबद्धता जनाए पनि पछि बैठकमा बोल्ने बेलामा मिति नतोकी एक हप्ताभित्र भनेको हो ।

विपक्षी दलले रास्वपाका प्रमुख सचेतक कविन्द्र बुर्लाकोटीको प्रतिबद्धताअनुसार रुलिङ गर्न माग गरेका छन् । एमालेले बैठकमा भएको सहमति सभामुखले कार्यान्वन नगरेको बताएको छ ।

विपक्षले भनाइ राखेपछि अहिले बैठक चलिरहेको छ ।