पाकिस्तानको राजधानी इस्लामावादमा सुक्रबार दिउँसो भएको बम विस्फोट ३१ जनाको मृत्यु भएको छ भने १७० भन्दा बढी घाइते भएका छन् ।

इस्लामावादको शिया मस्जिद कासर–ए–खदिजतुल कुब्रामा शुक्रबारको नमाजका क्रममा आत्मघाती विस्फोट भएको हो । मृत्यु हुनेको संख्या अझै बढ्न सक्ने बताइएको छ ।

विस्फोटपछि त्यहाँ संकटकाल घोषणा गरिएको छ । प्रहरी र सेनाले शिया मस्जिद वरपरको क्षेत्रलाई घेरा हालेका छन् । शंकास्पद गतिविधिको अनुगमन भइरहेको छ । विष्फोटको कारण खुल्न सकेको छैन र अहिलेसम्म कुनै पनि आतंकवादी संगठनले जिम्मेवारी लिएको छैन ।

स्मरणरहोस् इस्लामावादमा ३ महिनाअघि आत्मघाती बम विस्फोट भएको थियो । करिब तीन महिनाअघि नोभेम्बर ११, २०२५ मा इस्लामावादको जी–११ क्षेत्रमा रहेको जिल्ला तथा सत्र अदालत भवन बाहिर आत्मघाती विस्फोट भएको थियो । उक्त विस्फोटमा १२ जनाको मृत्यु भएको थियो भने ३० जनाभन्दा बढी घाइते भएका थिए ।