तेहरान : इरानका सर्वोच्च नेता अली खामेनीले अमेरिकालाई कडा चेतावनी दिँदै आफ्नो देशमाथि आक्रमण भए त्यसको परिणाम ‘क्षेत्रीय युद्ध’ हुने बताएका छन्। अमेरिकी राष्ट्रपति डोनाल्ड ट्रम्पले मध्यपूर्वमा सैन्य शक्ति बढाइरहेका बेला ८६ वर्षीय खामेनीले तेहरानमा आयोजित एक कार्यक्रममा यस्तो चेतावनी दिएका हुन्।

सन् १९७९ मा आयतल्लाह रुहोल्लाह खोमेनी निर्वासनबाट फर्किएको ऐतिहासिक दिनको सम्झनामा आयोजित सभालाई सम्बोधन गर्दै उनले अमेरिकाले इरानको तेल र प्राकृतिक ग्यास स्रोत कब्जा गर्न चाहेको आरोप लगाए। खामेनीले हालै इरानमा भएका सरकार विरोधी प्रदर्शनहरूलाई ‘कू’ को प्रयास र ‘राजद्रोह’ को संज्ञा दिएका छन्। उनले प्रदर्शनकारीहरूले बैंक, मस्जिद र सरकारी कार्यालयहरूमा आक्रमण गरेर देशलाई अस्थिर बनाउन खोजेको दाबी गरे।

खामेनीको यो चेतावनीपछि प्रतिक्रिया दिँदै अमेरिकी राष्ट्रपति ट्रम्पले आफूले इरानसँग कुनै सम्झौता हुने आशा राखेको बताए। उनले पत्रकारहरूसँग भने, ‘आशा गरौँ हाम्रो सम्झौता हुनेछ। यदि सम्झौता भएन भने खामेनीको चेतावनी कति सही थियो भन्ने कुरा पछि थाहा हुनेछ।’

आन्दोलनमा भएको क्षति र विवादित तथ्याङ्क इरानमा गत डिसेम्बर २८ देखि आर्थिक मन्दी, भ्रष्टाचार र मुद्रास्फीतिको विरोधमा सुरु भएको आन्दोलन पछि देशव्यापी बनेको थियो। संयुक्त राष्ट्रसंघ र अन्तर्राष्ट्रिय मानवअधिकार समूहहरूका अनुसार सुरक्षा बलको दमनमा परी हजारौँ मानिसले ज्यान गुमाएका छन्। संयुक्त राष्ट्रसंघका एक विशेष प्रतिवेदनले मृतकको सङ्ख्या २० हजार नाघ्न सक्ने अनुमान गरेको छ भने केही अधिकारवादी संस्थाहरूले ६ हजार ७ सयभन्दा बढीको मृत्यु भएको दाबी गरेका छन्।

यद्यपि, इरानी अधिकारीहरूले भने यी हत्याका लागि अमेरिका र इजरायलद्वारा पोषित ‘आतङ्ककारी’ जिम्मेवार रहेको बताउँदै आएका छन्। इरानी सञ्चारमाध्यमले ३ हजार १ सय १७ जनाको मृत्यु भएको र त्यसमा अधिकांश सर्वसाधारण रहेको उल्लेख गरेका छन्।

राष्ट्रपति मसुद पेजेस्कियानले आन्दोलनमा मारिएकाहरूको वास्तविक विवरण सार्वजनिक गर्ने आश्वासन दिए पनि अहिलेसम्म कुनै समयतालिका सार्वजनिक गरिएको छैन। यता, आम इरानी नागरिकहरूले भने सरकारको दाबीप्रति अविश्वास प्रकट गर्दै देश शोकमा रहेको बताएका छन्।