काठमाडौं : त्रिदेशीय टी–२० क्रिकेट शृङ्खलाको उपाधि न्युजिल्यान्डले जितेको छ । फाइनल खेलमा न्युजिल्यान्डले दक्षिण अफ्रिकालाई तीन रनले हरायो । न्युजिल्यान्डले दिएको एक सय ८१ रनको लक्ष्य पछ्याएको दक्षिण अफ्रिकाले निर्धारित २० ओभरमा छ विकेट गुमाएर एक सय ७७ रन मात्र बनाउन सक्यो ।

दक्षिण अफ्रिकाका लुआन–ड्रे प्रिटोरियसले सबैभन्दा धेरै ५१ रन बनाए । यस्तै रीजा हेन्ड्रिक्सले ३७ र डिवाल्ड व्रेभिजले ३१ रन बनाए । न्युजिल्यान्डका म्याट हेनरीले दुई तथा ज्याकब डफी, जकारी फाउल्क्स, एडम मिल्ने र माइकल ब्रेसवेलले समान एक विकेट लिए ।

त्यसअघि जिम्बाब्वेको हरारेमा टस हारेर ब्याटिङ गरेको न्युजिल्यान्डले पाँच विकेट गुमाएर एक सय ८० रन बनाएको थियो । न्युजिल्यान्डका डेभन कोनवे र रचिन रविन्द्रले समान ४७ रन बनाए । दक्षिण अफ्रिकाका लुङ्गी न्गिडीले दुई तथा नान्द्रे बर्गर, क्वेना माफाका र सेनुरान मुथुसामीले समान एक विकेट लिए । शृङ्खलामा अपराजित रहँदै न्युजिल्यान्डले उपाधि जितेको हो । घरेलु टोली जिम्बाब्वेले शृङ्खलामा कुनै पनि खेल जित्न सकेन ।